പൊങ്കൽ അവധിയ്ക്ക് ബെംഗളൂരുവിൽ നിന്ന് സ്പെഷ്യൽ ട്രെയിൻ;

 പൊങ്കൽ അവധിയുടെ തിരക്ക് പരിഗണിച്ചാണ് ബെംഗളൂരുവിൽ നിന്ന് കേരളത്തിലേക്ക് സ്പെഷ്യൽ ട്രെയിനുകൾ പ്രഖ്യാപിച്ചിരിക്കുന്നത്

കൊച്ചി: പൊങ്കൽ അവധിയ്ക്ക് കേരളത്തിലേക്ക് സ്പെഷ്യൽ ട്രെയിൻ പ്രഖ്യാപിച്ച് സതേൺ റെയിൽവേ. ബാംഗ്ലൂർ കൻ്റോൺമെൻ്റ് സ്റ്റേഷനിൽ നിന്ന് കണ്ണൂരിലേക്കാണ് ട്രെയിൻ സർവീസ്. ജനുവരി 13 ചൊവ്വാഴ്ചയാണ് ബാംഗ്ലൂർ – കണ്ണൂർ സർവീസ്. ജനുവരി 14ന് കണ്ണൂർ – ബാംഗ്ലൂർ റൂട്ടിലും ട്രെയിൻ സർവീസ് നടത്തും. ഇരുദിശകളിലേക്കും ഓരോ സർവീസ് വീതമാണ് പ്രഖ്യാപിച്ചിരിക്കുന്നത്.

പൊങ്കൽ സ്പെഷ്യൽ ട്രെയിനിൻ്റെ ടിക്കറ്റ് റിസർവേഷൻ ഇന്ന് രാവിലെ എട്ട് മണിയ്ക്ക് ആരംഭിച്ചു. 13 സ്റ്റോപ്പുകളുള്ള ട്രെയിനിൻ്റെ 7 സ്റ്റോപ്പുകൾ കേരളത്തിലാണ്. ട്രെയിൻ ഷെഡ്യൂൾ, ടിക്കറ്റ് നിരക്ക് എന്നിവ വിശദമായി അറിയാം.

ട്രെയിൻ നമ്പർ 06577 ബാംഗ്ലൂർ കൻ്റോൺമെൻ്റ് – കണ്ണൂർ എക്സ്പ്രസ് ചൊവ്വാഴ്ച (ജനുവരി 13) രാത്രി 07.00 നാണ് പുറപ്പെടുക. പിറ്റേന്ന് രാവിലെ 07.50 ന് കണ്ണൂരിലെത്തും. ബുധനാഴ്ച പുലർച്ചെ 1.50 നാണ് ട്രെയിൻ പാലക്കാട് എത്തുക. തുടർന്ന് 2.55 ഷൊർണൂർ, 3.43 തിരൂർ, 4.27 കോഴിക്കോട്, 5.08 വടകര, 5.33 തലശേരി എന്നീ സ്റ്റേഷനുകൾ പിന്നിട്ടാണ് 7.50ന് കണ്ണൂരിലെത്തുക.

മടക്കയാത്ര ട്രെയിൻ നമ്പർ 06578 കണ്ണൂർ – ബാംഗ്ലൂർ കൻ്റോൺമെൻ്റ് എക്സ്പ്രസ് ജനുവരി 14 ബുധനാഴ്ച രാവിലെ 11.30ന് കണ്ണൂരിൽ നിന്ന് പുറപ്പെട്ട് ഞായറാഴ്ച പുലർച്ചെ 04.10ന് ബാഗ്ലൂർ കൻ്റോൺമെൻ്റ് സ്റ്റേഷനിലെത്തും. തലശേരി 11.48 , വടകര 12.08 , കോഴിക്കോട് 12.52 , തിരൂർ 01.28 , ഷൊർണൂർ 02. 55 , പാലക്കാട് 04.02 എന്നിങ്ങനെയാണ് ട്രെയിൻ കേരളത്തിലെ വിവിധ സ്റ്റേഷനുകളിലെത്തുന്ന ട്രെയിൻ.

1 എസി ടു ടയർ കോച്ച്, 4 എസി ത്രീ ടയർ കോച്ച്, 8 സ്ലീപ്പർ ക്ലാസ് കോച്ച്, 6 ജനറൽ സെക്കൻഡ് ക്ലാസ് കോച്ച്, 2 സെക്കൻഡ് ക്ലാസ് കോച്ചുകൾ എന്നിങ്ങനെയാണ് സ്പെഷ്യൽ ട്രെയിനുള്ളത്.

കണ്ണൂർ സർവീസിന് പുറമെ ബാംഗ്ലൂർ – കൊല്ലം റൂട്ടിലും സ്പെഷ്യൽ ട്രെയിൻ പ്രഖ്യാപിച്ചിട്ടുണ്ട്. ജനുവരി 13 ന് തന്നെയാണ് ഈ സർവീസും ആരംഭിക്കുന്നത്. ചൊവ്വാഴ്ച രാത്രി 11.00 മണിക്ക് ബാംഗ്ലൂരിൽ നിന്ന് പുറപ്പെടുന്ന ട്രെയിൻ അടുത്ത ദിവസം വൈകീട്ട് 4.00 മണിക്കാണ് കൊല്ലത്ത് എത്തുക. മടക്കയാത്ര ജനുവരി 14 ന് വൈകീട്ട് 6.30 ന് കൊല്ലത്ത് നിന്ന് ആരംഭിച്ച് അടുത്ത ദിവസം രാവിലെ പത്തരയ്ക്ക് ബാംഗ്ലൂർ കൻ്റോൺമെൻ്റിൽ എത്തും.