ഇടുക്കി: ശൈത്യകാലത്തിന്റെ വരവോടെ മൂന്നാർ വീണ്ടും സഞ്ചാരികളുടെ പ്രിയ ഇടമായി മാറിക്കൊണ്ടിരിക്കുകയാണ്.
ഇന്ന് മൂന്നാറിൽ താപനില പൂജ്യം ഡിഗ്രി സെൽഷ്യസിലെത്തിയതോടെ പ്രദേശം അതിശൈത്യത്തിന്റെ പിടിയിലായി.
നല്ലതണ്ണി, നടയാർ, തെന്മല, കന്നിമല തുടങ്ങിയ ഉയർന്ന പ്രദേശങ്ങളിലാണ് ഏറ്റവും കൂടുതൽ തണുപ്പ് റിപ്പോർട്ട് ചെയ്തിരിക്കുന്നത്. ഉൾപ്രദേശങ്ങളിൽ മൈനസ് ഡിഗ്രി വരെ താപനില താഴ്ന്നതായി നാട്ടുകാർ പറയുന്നു.
ദേവികുളം മേഖലയിൽ വാഹനങ്ങളുടെ മേൽ ഐസ് തുള്ളികൾ രൂപപ്പെട്ടത് കടുത്ത ശൈത്യത്തിന്റെ വ്യക്തമായ തെളിവായി.
ഇന്ന് പുലർച്ചെ മൂന്നാർ ടൗണിൽ രേഖപ്പെടുത്തിയ കുറഞ്ഞ താപനില 1.7 ഡിഗ്രി സെൽഷ്യസായിരുന്നു. ഇത് ഈ സീസണിലെ ഏറ്റവും കുറഞ്ഞ താപനിലയായാണ് കണക്കാക്കപ്പെടുന്നത്.
കഴിഞ്ഞ കുറേ ദിവസങ്ങളായി മൂന്നാറിൽ തുടർച്ചയായി കുറഞ്ഞ താപനിലയാണ് രേഖപ്പെടുത്തുന്നത്. പ്രത്യേകിച്ച് രാത്രിയും പുലർച്ചെയും ശക്തമായ തണുപ്പാണ് അനുഭവപ്പെടുന്നത്.
കഴിഞ്ഞ വർഷം ഡിസംബർ 23-ന് മൂന്നാറിൽ മൈനസ് രണ്ട് ഡിഗ്രി സെൽഷ്യസ് വരെ താപനില കുറഞ്ഞിരുന്നു. സാധാരണയായി ഡിസംബർ, ജനുവരി മാസങ്ങളിലാണ് മൂന്നാറിൽ ഏറ്റവും കൂടുതൽ ശൈത്യം അനുഭവപ്പെടാറുള്ളത്.
കാലാവസ്ഥാ റിപ്പോർട്ടുകൾ പ്രകാരം, ഈ മാസം അവസാനത്തോടെ വീണ്ടും താപനില മൈനസ് നിലയിലേക്ക് എത്താൻ സാധ്യതയുണ്ടെന്നാണ് സൂചന.
താപനില പൂജ്യം ഡിഗ്രി സെൽഷ്യസിൽ; തണുത്ത് വിറച്ച് മൂന്നാർ
കടുത്ത തണുപ്പ് മൂന്നാറിലെ ദൈനംദിന ജീവിതത്തെ ബാധിച്ചിട്ടുണ്ടെങ്കിലും, ഏറെക്കാലമായി മന്ദഗതിയിലായിരുന്ന വിനോദസഞ്ചാര മേഖലയ്ക്ക് ഇത് വലിയ ആശ്വാസമായി മാറിയിരിക്കുകയാണ്.
തണുപ്പ് അനുഭവിക്കാനായി നിരവധി സഞ്ചാരികളാണ് മൂന്നാറിലേക്ക് ഒഴുകിയെത്തുന്നത്. പുലർച്ചെ നല്ലതണ്ണി, കന്നിമല, ലക്ഷ്മി എസ്റ്റേറ്റ് തുടങ്ങിയ പ്രദേശങ്ങളിലെ പുൽമേടുകളിലെത്തുന്നവർക്ക് മഞ്ഞുതുള്ളികൾ മൂടിയ പ്രകൃതിദൃശ്യങ്ങൾ ആസ്വദിക്കാൻ കഴിയും.
മൂന്നാറിന്റെ ഏറ്റവും വലിയ ആകർഷണങ്ങളിൽ ഒന്നാണ് ഇരവികുളം ദേശീയോദ്യാനം. ഇവിടെ വംശനാശ ഭീഷണി നേരിടുന്ന വരയാടുകളെ അടുത്ത് കാണാനുള്ള അവസരം സഞ്ചാരികൾക്ക് ലഭിക്കുന്നു.
കൂടാതെ മാട്ടുപ്പട്ടിയിലെ ബോട്ടിംഗ് സൗകര്യങ്ങൾ, എക്കോ പോയിന്റിലെ പ്രകൃതിദത്ത പ്രതിധ്വനി, കുണ്ടള ഡാം, ടോപ് സ്റ്റേഷൻ തുടങ്ങിയ സ്ഥലങ്ങളും വിനോദസഞ്ചാരികളുടെ പ്രിയപ്പെട്ട കേന്ദ്രങ്ങളാണ്.
