ടോക്കിയോ: ജപ്പാനിൽ വീണ്ടും ഭൂചലനം. റിക്ടർ സ്കെയിലിൽ 6.0 തീവ്രത രേഖപ്പെടുത്തിയ ശക്തമായ ഭൂചലനാണ് രാജ്യത്ത് അനുഭവപ്പെട്ടത്. നിലവിൽ സുനാമി മുന്നറിയിപ്പ് നൽകിയിട്ടില്ല. തായ്‍വാനെ പിടിച്ചു കുലുക്കിയ ഭൂചലനത്തിന്‍റെ പിറ്റേദിവസമാണ് ജപ്പാനിലും ഭൂകമ്പം അനുഭവപ്പെട്ടത്. രണ്ടാഴ്ച മുന്നേയും ജപ്പാനിൽ ഭൂചലനം റിപ്പോർട്ട് ചെയ്തിരുന്നു.
ഫുകുഷിമ പ്രവിശ്യയുടെ തീരത്താണ് ഭൂചലനത്തിന്‍റെ പ്രഭവകേന്ദ്രം. ആളപായമോ നാശനഷ്ടമോ ഇതുവരെ റിപ്പോർട്ട് ചെയ്തിട്ടില്ല. അതേസമയം ഇന്നലെ തായ്‍വാനിലുണ്ടായ ഭൂചലനത്തിൽ ഒൻപത് പേർ കൊല്ലപ്പെട്ടിരുന്നു. ആയിരത്തിലധികം പേർക്കാണ് പരിക്കേറ്റത്.
25 വർഷത്തിനിടയിലെ ഏറ്റവും വലിയ ഭൂചലനമാണ് ഇന്നലെ രാവിലെ തായ്‍വാനിലുണ്ടായത്.തായ്‍വാൻ തലസ്ഥാനമായ തായ്പേ സിറ്റിയിൽ പ്രാദേശിക സമയം 8 മണിയ്ക്കായിരുന്നു ഭൂചലനം അനുഭവപ്പെട്ടത്. റിക്ടർ സ്കെയിലിൽ 7.4 തീവ്രത രേഖപ്പെടുത്തിയ ചലനമാണ് രാജ്യത്തെ പിടിച്ചു കുലുക്കിയത്. വൈദ്യുതി വിതരണം താറുമാറായി. 87,000 വീടുകളിലേക്കുള്ള വൈദ്യുതിയാണ് നിലച്ചിരുന്നത്.
