പത്തനംതിട്ടയില്‍ നഴ്സിങ് വിദ്യാര്‍ഥിനിയെ വീട്ടില്‍ തൂങ്ങിമരിച്ച നിലയില്‍ കണ്ടെത്തി. കോന്നി എലിയറയ്ക്കല്‍ കാളഞ്ചിറ അനന്തുഭവനില്‍ അതുല്യ (20) ആണ് മരിച്ചത്. ബെംഗളൂരുവിലെ ഒരു നഴ്സിങ് കോളേജില്‍ പഠിച്ചിരുന്ന അതുല്യയ്ക്ക് ഫീസ് അടയ്ക്കാന്‍ കഴിഞ്ഞിരുന്നില്ല. ഇതോടെ പഠനം മുടങ്ങി. ഇതില്‍ മനംനൊന്താണ് അതുല്യ ജീവനൊടുക്കിയതെന്ന് ബന്ധുക്കള്‍ പറഞ്ഞു. വായ്പ തേടി ബാങ്കുകളെ സമീപിച്ചിരുന്നെങ്കിലും നിരാശയായിരുന്നു ഫലം.
ബെംഗളൂരുവിലെ ഒരു ട്രസ്റ്റിന്റെ സഹായത്തോടെ കഴിഞ്ഞ വര്‍ഷമാണ് അതുല്യ നഴ്സിങ് അഡ്മിഷന്‍ നേടിയത്. തുടര്‍ന്ന് ഒന്നാം വര്‍ഷത്തെ പഠനം പൂര്‍ത്തിയാക്കി അതുല്യ നാട്ടിലെത്തി. ഇതിന് പിന്നാലെ ഈ ട്രസ്റ്റ് വായ്പാ തട്ടിപ്പ് കേസില്‍ കുടുങ്ങി. ട്രസ്റ്റ് അധികൃതരെ കര്‍ണാടക പൊലീസ് അറസ്റ്റും ചെയ്തു. ഇതോടെ അതുല്യയ്ക്കും സമാന രീതിയില്‍ പണം കണ്ടെത്തിയ ഒട്ടേറെ വിദ്യാര്‍ഥികളും പ്രതിസന്ധിയിലായി. ബാങ്കുകളും കൈ മലര്‍ത്തിയതോടെ എല്ലാ പ്രതീക്ഷയും അവസാനിച്ചു.
തുടര്‍ന്ന് കോളേജ് അധികൃതരെ വിദ്യാര്‍ഥികള്‍ സമീപിച്ചു. ആദ്യവര്‍ഷത്തെ ഫീസ് അടച്ച് അഡ്മിഷന്‍ പുതുക്കി വീണ്ടും ഒന്നാംവര്‍ഷം മുതല്‍ പഠിക്കണമെന്ന നിര്‍ദേശമാണ് ഇവര്‍ക്ക് ലഭിച്ചത്. ഇതിന് പിന്നാലെയാണ് വീട്ടില്‍ തിരിച്ചെത്തിയ അതുല്യ തൂങ്ങിമരിച്ചത്. വീട്ടുകാര്‍ ഉടന്‍ തന്നെ അതുല്യയെ കോഴഞ്ചേരിയിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. ശനിയാഴ്ചയായിരുന്നു മരണം. ഞായറാഴ്ച വീട്ടുവളപ്പില്‍ മൃതദേഹം സംസ്‌കരിച്ചു.
