മുന്‍വൈരാഗ്യത്തെ തുടര്‍ന്ന് സുഹൃത്തിനെ വെട്ടിക്കൊല്ലാന്‍ ശ്രമിച്ച പ്രതി അറസ്റ്റില്‍. നേര്യമംഗലം, പിറക്കുന്നം, ഇഞ്ചിപ്പാറ പാലമൂട്ടിൽ വീട്ടിൽ ഷാജി (52) യെയാണ് ഊന്നുകൽ പോലീസ് അറസ്റ്റ് ചെയ്തത്. നേര്യമംഗലം സ്വദേശി ജോർജിനെയാണ് ആക്രമിച്ചത്. ഇരുവരും സുഹൃത്തുക്കളും ചില കേസുകളില്‍ കൂട്ടുപ്രതികളുമാണ്. ഇവര്‍ തമ്മില്‍ തെറ്റിയപ്പോള്‍ ഷാജി ജോര്‍ജിനെ വെട്ടിക്കൊല്ലാന്‍ ശ്രമിക്കുകയായിരുന്നു. തിങ്കളാഴ്ച വൈകീട്ട് 8 മണിയോടെ തലക്കോട് മുള്ളരിങ്ങാട് കവലയിലാണ് സംഭവം.
ജോര്‍ജിനെ ഷാജി വാക്കത്തികൊണ്ട് ആക്രമിക്കുകയും ബൈക്ക് തീവെച്ച് നശിപ്പിക്കുകയും ചെയ്തിരുന്നു. മുന്‍വൈരാഗ്യമാണ് സംഭവത്തിനു പിന്നില്‍ എന്നാണ് ഷാജി പോലീസിനോട് പറഞ്ഞത്. ഇൻസ്പെക്ടർ രതീഷ് ഗോപാൽ, എസ് ഐ കെ.പി.സിദ്ദിഖ്, എ എസ് ഐ പി.എ.സുധീഷ്, എസ് സി പി ഒ എൻ.നിഷാന്ത് കുമാർ, എ.പി.ഷിനോജ്, സി പി ഒ എൻ.യു.ദയേഷ് എന്നിവരാണ് അന്വേഷണ സംഘത്തിലുണ്ടായിരുന്നത്.
