ഗോവ അന്താരാഷ്ട്ര ചലച്ചിത്ര മേളയിൽ ഇനിമുതൽ മികച്ച വെബ്സീരീസിനുള്ള പുരസ്കാരവും. ഇന്ത്യൻ ഭാഷയിൽ ചിത്രീകരിച്ച ഒറിജിനൽ സീരീസുകൾക്കാണ് പുരസ്കാരം ലഭിക്കുകയെന്ന് കേന്ദ്ര വാർത്താവിനിമയ-പ്രക്ഷേപണ വകുപ്പ് മന്ത്രി അനുരാഗ് ഠാക്കൂർ വ്യക്തമാക്കി. ട്വിറ്ററിലൂടെയാണ് മന്ത്രി ഐ എഫ്.എഫ്ഐ യിലെ പുതിയ മത്സരവിഭാഗം പ്രഖ്യാപിച്ചത്.
ഇന്ത്യയിലെ ഒടിടി മേഖലയെ പ്രോത്സാഹിപ്പിക്കുന്നതിന്റെ ഭാഗമായാണ് ചലച്ചിത്രമേളയിൽ വെബ്സീരീസുകൾക്കുള്ള പുരസ്കാരവും നൽകുന്നത്. പുതിയ സൃഷ്ടികൾ ഉണ്ടാകുക, ഇന്ത്യൻ ഭാഷകളിലെ ഉള്ളടക്കം പ്രോത്സാഹിപ്പിക്കുക, അസാധാരണമായ കഴിവുകളെ തിരിച്ചറിയുക, ഒടിടി വ്യവസായത്തിന്റെ വളർച്ചയും നവീകരണവും പ്രോത്സാഹിപ്പിക്കുക എന്നിവയാണ് പുരസ്കാരം ലക്ഷ്യമിടുന്നുണ്ട്. ഗോവ അന്താരാഷ്ട്ര ചലച്ചിത്രമേളയിൽ വെബ്സീരീസുകൾക്കുള്ള പുരസ്കാരവും ഉൾപ്പെടുത്തുന്നതിൽ സന്തോഷമുണ്ടെന്ന് മന്ത്രി പറഞ്ഞു.
“അസാമാന്യ പ്രതിഭകളാൽ സമ്പന്നമാണ് ഇന്ത്യ. ലോകത്തെ നയിക്കാൻ തയ്യാറുള്ള, ഒരു കോടി സ്വപ്നങ്ങളുള്ള, ഉയർച്ചയും അഭിലാഷവുമുള്ള ഒരു പുതിയ ഇന്ത്യയുടെ കഥ പറയാൻ ഞാൻ നിങ്ങളെ സ്വാഗതം ചെയ്യുന്നു. ഏതെങ്കിലും ഒടിടി പ്ലാറ്റ്‌ഫോമിൽ സംപ്രേക്ഷണം ചെയ്യുന്ന, ഇന്ത്യൻ ഭാഷയിൽ ചിത്രീകരിച്ച യഥാർത്ഥ വെബ് സീരീസിനാണ് പുരസ്കാരം നൽകുന്നത്. ഈ വർഷം മുതൽ എല്ലാവർഷവും വെബ്സീരീസുകൾക്കുള്ള പുരസ്കാരം നൽകും.” അനുരാഗ് താക്കൂർ വ്യക്തമാക്കി.
2023 നവംബർ 20 മുതൽ നവംബർ 28 വരെയാണ് 54-ാമത് ഐഎഫ്എഫ്ഐ നടക്കുന്നത്.
