കെആര്‍കെ എന്ന ചുരുക്കപ്പേരില്‍ അറിയപ്പെടുന്ന നടനും നിര്‍മ്മാതാവും ട്രേഡ് അനലിസ്റ്റുമായ കമല്‍ ആര്‍ ഖാന്‍ മുംബൈയില്‍ അറസ്റ്റിലായി. വിദ്വേഷ പരാമര്‍ശമടങ്ങിയ 2020ലെ ചില ട്വീറ്റുകളിന്മേലുള്ള പരാതിയെത്തുടര്‍ന്നാണ് അറസ്റ്റ്. മുംബൈയിലെ മലാഡ് പൊലീസ് ആണ് അറസ്റ്റ് രേഖപ്പെടുത്തിയത്. മുംബൈ വിമാനത്താവളത്തില്‍ വച്ച് ഇന്ന് രാവിലെയായിരുന്നു അറസ്റ്റ്.
ബോളിവുഡ് താരങ്ങളായ ഇര്‍ഫാന്‍ ഖാന്‍റെയും റിഷി കപൂറിന്‍റെയും മരണവുമായി ബന്ധപ്പെട്ട് കമല്‍ ആര്‍ ഖാന്‍ ചില ട്വീറ്റുകള്‍ നടത്തിയിരുന്നു. ഇര്‍ഫാന്‍ ഖാന്‍റെ മരണം താന്‍ മുന്‍പേ പ്രവചിച്ചിരുന്നുവെന്നും അടുത്തത് ആരാണെന്ന് തനിക്കറിയാമെന്നുമായിരുന്നു റിഷി കപൂറിന്‍റെ അനാരോഗ്യം സൂചിപ്പിച്ചുകൊണ്ടുള്ള ട്വീറ്റ്. യുവസേനാ നേതാവ് രാഹുല്‍ കനല്‍ ആണ് ഈ ട്വീറ്റുകള്‍ മുന്‍നിര്‍ത്തി കമലിനെതിരെ പരാതിയുമായി പോയത്. 2020 ഏപ്രില്‍ 30ന് നല്‍കിയ പരാതിയെത്തുടര്‍ന്നാണ് ഇന്ന് നടന്‍റെ അറസ്റ്റ് ഉണ്ടായത്.
