കൊച്ചി: നടിയെ പീഡിപ്പിച്ച കേസിലെ പ്രതിയും നിര്‍മാതാവുമായ വിജയ് ബാബു ബുധനാഴ്ച കൊച്ചിയില്‍ എത്തുമെന്ന് വിവരം. തിങ്കളാഴ്ച രാവിലെ എത്താനാണ് ആദ്യം തീരുമാനിച്ചിരുന്നത്. ഇതുപ്രകാരം ടിക്കറ്റെടുക്കുകയും ചെയ്തിരുന്നു. എന്നാല്‍ പിന്നീട് ടിക്കറ്റ് റദ്ദാക്കിയെന്ന് പോലീസ് സൂചിപ്പിച്ചു. ഇപ്പോള്‍ വ്യക്തമാകുന്നത്, വിജയ് ബാബു യാത്രാ ദിവസം മാറ്റി എന്നാണ്.
ബുധനാഴ്ച ഇതേ വിമാനത്തില്‍ കൊച്ചിയിലെത്തുമെന്നാണ് പുതിയ വിവരം. പുലര്‍ച്ചെ ദുബായില്‍ നിന്ന് പുറപ്പെട്ട് രാവിലെ ഒമ്പത് മണിയോടെ കൊച്ചിയിലെത്തുന്ന വിമാനത്തിലാണ് വിജയ് ബാബുവിന്റെ പേരില്‍ പുതിയ ടിക്കറ്റുള്ളത്. അതേസമയം, വിജയ് ബാബുവിന്റെ മുന്‍കൂര്‍ ജാമ്യ ഹര്‍ജി ഹൈക്കോടതി ചൊവ്വാഴ്ചത്തേക്ക് മാറ്റിവച്ചു. നാളെ ഹര്‍ജി വീണ്ടും പരിഗണിക്കും.
