നമ്മുടെ വീടുകൾ എപ്പോഴും സുരക്ഷിതമാണെന്നാണ് നമ്മൾ കരുതുന്നത്. എന്നാൽ നമ്മൾ ദിവസവും ആഹാരം പാകം ചെയ്യാനും സംഭരിക്കാനും ഉപയോഗിക്കുന്ന ചില സാധനങ്ങൾ ഗുരുതരമായ ആരോഗ്യപ്രശ്നങ്ങൾക്കും ക്യാൻസറിനും വരെ കാരണമായേക്കാമെന്ന് പഠനങ്ങൾ മുന്നറിയിപ്പ് നൽകുന്നു. അത്തരത്തിൽ അടുക്കളയിൽ നിന്ന് നമ്മൾ അടിയന്തരമായി ഒഴിവാക്കേണ്ട 4 പ്രധാന വില്ലന്മാരെയും അവയ്ക്ക് പകരമായി ഉപയോഗിക്കേണ്ട സുരക്ഷിത മാർഗ്ഗങ്ങളെയും കുറിച്ചും അറിയാം
1. കേടുപാടുകൾ സംഭവിച്ച ടെഫ്ലോൺ പാനുകൾ
നോൺ-സ്റ്റിക് പാത്രങ്ങളിൽ പോറലുകൾ വീഴുമ്പോൾ അതിലെ ടെഫ്ലോൺ കോട്ടിംഗ് ഇളകി ഭക്ഷണത്തിൽ കലരാൻ തുടങ്ങുന്നു. ഇത്തരം പാത്രങ്ങൾ അമിതമായി ചൂടാകുമ്പോൾ ‘ഫോറെവർ കെമിക്കൽസ്’ എന്നറിയപ്പെടുന്ന PFAS, PFOA തുടങ്ങിയ മാരക വിഷവാതകങ്ങളും രാസവസ്തുക്കളും പുറന്തള്ളുന്നു. ഇത് കരൾ, വൃക്ക, അണ്ഡാശയം തുടങ്ങിയ അവയവങ്ങളിലെ ക്യാൻസറിന് കാരണമാകുന്നു.
പരിഹാരം
പോറലുകൾ വീണ നോൺ-സ്റ്റിക് പാത്രങ്ങൾ ഉടൻ മാറ്റുക. ദീർഘകാല സുരക്ഷയ്ക്കായി സ്റ്റെയിൻലെസ്സ് സ്റ്റീൽ അല്ലെങ്കിൽ കാസ്റ്റ് അയൺ പാത്രങ്ങൾ പാചകത്തിനായി തെരഞ്ഞെടുക്കുക. ഈ പാത്രങ്ങൾ 300 ഡിഗ്രി സെൽഷ്യസിനു മുകളിൽ (570°F) അമിതമായി ചൂടാകുമ്പോഴാണ് ടെഫ്ലോൺ കോട്ടിംഗ് തകരുകയും വിഷവാതകങ്ങൾ പുറന്തള്ളുകയും ചെയ്യുന്നത്. കൂടാതെ, പോറലുകൾ വീണ പാത്രങ്ങൾ ഉപയോഗിക്കുമ്പോൾ ഇവയുടെ സൂക്ഷ്മകണികകൾ ഭക്ഷണത്തിൽ കലരാൻ സാധ്യതയുണ്ടെന്ന് ചൂണ്ടിക്കാണിക്കുന്നു
2. പ്ലാസ്റ്റിക് ചോപ്പിംഗ് ബോർഡ്
പ്ലാസ്റ്റിക് ബോർഡുകളിൽ പച്ചക്കറികളും ഇറച്ചിയും നിരന്തരം മുറിക്കുമ്പോൾ അതിൽ ആഴത്തിൽ പോറലുകൾ വീഴുന്നു. ഈ പോറലുകളിലൂടെ ദശലക്ഷക്കണക്കിന് മാരകമായ മൈക്രോപ്ലാസ്റ്റിക് കണികകൾ നമ്മൾ പോലുമറിയാതെ ഭക്ഷണത്തിൽ കലരുകയും, അത് ശരീരത്തിലെത്തി ക്യാൻസർ പോലുള്ള രോഗങ്ങളിലേക്ക് നയിക്കുകയും ചെയ്യുന്നു.
ഔദ്യോഗിക പഠനം (2023)
നോർത്ത് ഡക്കോട്ട സ്റ്റേറ്റ് യൂണിവേഴ്സിറ്റിയിലെ (NDSU) ശാസ്ത്രജ്ഞർ നടത്തിയതും Environmental Science & Technology ജേണലിൽ പ്രസിദ്ധീകരിച്ചതുമായ പഠനപ്രകാരം, പ്ലാസ്റ്റിക് ബോർഡുകളിൽ പച്ചക്കറികൾ മുറിക്കുമ്പോൾ പ്രതിവർഷം 7.4 മുതൽ 50.7 ഗ്രാം വരെ മൈക്രോപ്ലാസ്റ്റിക് കണികകൾ ഭക്ഷണത്തിൽ കലരാൻ സാധ്യതയുണ്ടെന്ന് കണ്ടെത്തി. ഇത് ഏകദേശം 10 പ്ലാസ്റ്റിക് ക്രെഡിറ്റ് കാർഡുകളുടെ ഭാരത്തിന് തുല്യമാണ്.
അമേരിക്കൻ ക്യാൻസർ സൊസൈറ്റിയുടെ റിപ്പോർട്ട് അനുസരിച്ച്, മൈക്രോപ്ലാസ്റ്റിക്കുകൾ ഡിഎൻഎ (DNA) ഘടനയെ തകർക്കാനും കോശങ്ങളിൽ വീക്കം ഉണ്ടാക്കാനും സാധ്യതയുണ്ട്. ആരോഗ്യകരമായ കോശങ്ങളെ അപേക്ഷിച്ച് ക്യാൻസർ ട്യൂമറുകളിൽ മൈക്രോപ്ലാസ്റ്റിക്കിൻ്റെ സാന്നിധ്യം കൂടുതലായി കണ്ടെത്തിയിട്ടുണ്ടെങ്കിലും, ഇവ മനുഷ്യരിൽ നേരിട്ട് ക്യാൻസറിന് കാരണമാകുന്നു എന്ന് പൂർണ്ണമായി തെളിയിക്കാൻ കൂടുതൽ പഠനങ്ങൾ ആവശ്യമാണെന്ന് അവർ വ്യക്തമാക്കുന്നു.
പരിഹാരം
പ്ലാസ്റ്റിക് ചോപ്പിംഗ് ബോർഡുകൾ പൂർണ്ണമായും ഒഴിവാക്കുക. അതിനുപകരം തടികൊണ്ടുള്ള ചോപ്പിംഗ് ബോർഡുകൾ ഉപയോഗിക്കുക.
3. പ്ലാസ്റ്റിക് കണ്ടെയ്നറുകൾ
ചോറും കറികളും സൂക്ഷിക്കാൻ പ്ലാസ്റ്റിക് പാത്രങ്ങൾ ഉപയോഗിക്കുന്നത് ഇന്ന് സർവ്വസാധാരണമാണ്. എന്നാൽ ഈ പാത്രങ്ങൾ ചൂടാകുമ്പോഴോ, പഴകുമ്പോഴോ അതിലടങ്ങിയിരിക്കുന്ന ബി.പി.എ, താലേറ്റുകൾ തുടങ്ങിയ മാരക രാസവസ്തുക്കൾ ഭക്ഷണത്തിലേക്ക് പടരുന്നു. ഇത് ശരീരത്തിലെ ഹോർമോൺ സന്തുലിതാവസ്ഥ തെറ്റിക്കുകയും ക്യാൻസർ സാധ്യത വർധിപ്പിക്കുകയും ചെയ്യുന്നു.
സാധാരണയായി ക്യാൻസർ റിസർച്ച് യുകെ പോലുള്ള പ്രമുഖ സംഘടനകൾ വ്യക്തമാക്കുന്നത്, സാധാരണ ഊഷ്മാവിൽ പ്ലാസ്റ്റിക് പാത്രങ്ങളിൽ ഭക്ഷണം സൂക്ഷിക്കുന്നത് നേരിട്ട് ക്യാൻസറിന് കാരണമാകുന്നു എന്നതിന് കൃത്യമായ തെളിവുകളില്ല എന്നാണ്.
എന്നാൽ, പ്ലാസ്റ്റിക് പാത്രങ്ങൾ മൈക്രോവേവ് ഓവനിലോ മറ്റോ വെച്ച് കഠിനമായി ചൂടാക്കുമ്പോൾ ബി.പി.എ, ഫാലേറ്റുകൾ തുടങ്ങിയ രാസവസ്തുക്കൾ വേഗത്തിൽ ഭക്ഷണത്തിലേക്ക് പടരും. ഇവ ശരീരത്തിലെ ഹോർമോൺ സന്തുലിതാവസ്ഥയെ ബാധിക്കുന്നവയാണെന്ന് ലോകാരോഗ്യ സംഘടനയുടെ അനുബന്ധ സ്ഥാപനങ്ങൾ മുന്നറിയിപ്പ് നൽകുന്നു.
പരിഹാരം
പ്ലാസ്റ്റിക് ഡബ്ബകൾക്ക് പകരം സുരക്ഷിതവും ആരോഗ്യപ്രദവുമായ ഗ്ലാസ് കണ്ടെയ്നറുകൾ ശീലമാക്കുക.
4. പ്ലാസ്റ്റിക് കുപ്പികൾ
സാധാരണ പ്ലാസ്റ്റിക് കുപ്പികളിൽ വെള്ളം സൂക്ഷിക്കുന്നതും, അവ വീണ്ടും വീണ്ടും ഉപയോഗിക്കുന്നതും അത്യന്തം അപകടകരമാണ്. പ്രത്യേകിച്ച് വെയിലും ചൂടും ഏൽക്കുമ്പോൾ പ്ലാസ്റ്റിക്കിലെ രാസവസ്തുക്കൾ വെള്ളത്തിൽ അലിയുകയും ഇത് കുടിക്കുന്നതിലൂടെ ശരീരത്തിൽ ടോക്സിനുകൾ അടിഞ്ഞുകൂടുകയും ചെയ്യുന്നു. പ്ലാസ്റ്റിക് കുപ്പികളിലെ വെള്ളം വെയിലത്തോ ചൂടിലോ ദീർഘനേരം ഇരിക്കുമ്പോൾ പ്ലാസ്റ്റിക്കിലെ മാരകമായ രാസവസ്തുക്കൾ വെള്ളത്തിലേക്ക് വേഗത്തിൽ കലരുമെന്ന് പഠനങ്ങൾ വ്യക്തമാക്കുന്നു. ഒറ്റത്തവണ ഉപയോഗിക്കാൻ നിർമ്മിച്ചിട്ടുള്ള പ്ലാസ്റ്റിക് കുപ്പികൾ വീണ്ടും വീണ്ടും കഴുകി ഉപയോഗിക്കുന്നത് വഴിയും ഇത്തരം കെമിക്കൽ ലീച്ചിംഗ് വർധിക്കുമെന്ന് ശാസ്ത്രജ്ഞർ മുന്നറിയിപ്പ് നൽകുന്നു.
പരിഹാരം
പ്ലാസ്റ്റിക് കുപ്പികൾ പൂർണ്ണമായും ഉപേക്ഷിച്ച് ഗ്ലാസ് കുപ്പികളോ നല്ല ക്വാളിറ്റിയുള്ള സ്റ്റീൽ കുപ്പികളോ വെള്ളം സൂക്ഷിക്കാൻ ഉപയോഗിക്കുക.
ചുരുക്കത്തിൽ…
ഇവ നേരിട്ട് ക്യാൻസർ ഉണ്ടാക്കുമെന്ന് പൂർണ്ണമായി സ്ഥിരീകരിച്ചിട്ടില്ലെങ്കിലും, ഇവയിൽ നിന്ന് പുറത്തുവരുന്ന രാസവസ്തുക്കളും മൈക്രോപ്ലാസ്റ്റിക്കുകളും ശരീരത്തിന് ഹാനികരമാണെന്ന് ശാസ്ത്രലോകം സമ്മതിക്കുന്നു. അതുകൊണ്ട് മുൻകരുതൽ എന്ന നിലയിൽ ഇവയുടെ ഉപയോഗം കുറയ്ക്കാൻ ആരോഗ്യവിദഗ്ധര് നിർദേശിക്കുന്നു.
