മലയാളികളുടെ പ്രിയപ്പെട്ട റിയാലിറ്റി ഷോ താരവും നടിയുമായ അനുമോൾ വിവാഹിതയായി. തമിഴ് നടൻ ഭവ്നേഷാണ് വരൻ. ഗുരുവായൂർ ശ്രീകൃഷ്ണക്ഷേത്രത്തിൽ വെച്ച് പുലർച്ചെയായിരുന്നു വിവാഹച്ചടങ്ങുകൾ നടന്നത്. അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങിൽ പങ്കെടുത്തത്.
നടനും കേന്ദ്രസഹമന്ത്രിയുമായ സുരേഷ് ഗോപി വിവാഹത്തിനെത്തി നവവധുവിനെ അനുഗ്രഹിച്ചു. ചടങ്ങിനിടയിൽ ഇരുവരുടെയും കൈകൾ ചേർത്തുപിടിച്ച് “കൈ പിടിച്ചോ” എന്ന് സുരേഷ് ഗോപി പറയുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ ശ്രദ്ധ നേടുന്നുണ്ട്.
വിവാഹത്തിന് മുന്നോടിയായി ‘ഒരു പുതിയ തുടക്കത്തിന്റെ ആഘോഷം’ എന്ന അടിക്കുറിപ്പോടുകൂടി അനുമോൾ പങ്കുവെച്ച ചിത്രങ്ങൾക്ക് താഴെ നിരവധി ആരാധകരും സഹപ്രവർത്തകരും ആശംസകൾ അറിയിച്ചിരുന്നു. ആദില, ഷിയാസ് തുടങ്ങി നിരവധി പ്രമുഖർ കമന്റുകളുമായി എത്തിയിരുന്നു.
‘സ്റ്റാർ മാജിക്’ എന്ന ജനപ്രിയ ടെലിവിഷൻ പരിപാടിയിലൂടെയാണ് അനുമോൾ മലയാളികൾക്ക് പ്രിയങ്കരിയായി മാറുന്നത്.
തുടർന്ന് മലയാളം ബിഗ് ബോസ് സീസൺ ഏഴിലെ വിജയി കൂടിയായി താരം തിളങ്ങി. ‘സത്യ എന്ന പെൺകുട്ടി’, ‘അമ്മയറിയാതെ’, ‘വാനമ്പാടി’ തുടങ്ങിയ പ്രശസ്തമായ പരമ്പരകളിലും വേഷമിട്ട് ശ്രദ്ധ നേടിയിട്ടുണ്ട്.അടുത്തിടെ വിവാഹത്തെക്കുറിച്ചുള്ള ചോദ്യങ്ങൾക്ക് ‘നാളെയാണ് കല്യാണം’ എന്ന് രസകരമായി മറുപടി നൽകി അനുമോൾ സമൂഹമാധ്യമങ്ങളിൽ ഇടംപിടിച്ചിരുന്നു. മോഹൻലാൽ, മമ്മൂട്ടി, സുരേഷ് ഗോപി തുടങ്ങിയ പ്രമുഖരെല്ലാം വിവാഹത്തിന് ക്ഷണ പട്ടികയിലുണ്ടെന്ന് താരം തമാശയായി പറഞ്ഞിരുന്നു. അനുമോളുടെ വിവാഹം ഉടൻ ഉണ്ടാകുമെന്ന് സുഹൃത്ത് ഷിയാസ് കരീമും സൂചിപ്പിച്ചിരുന്നെങ്കിലും, വരൻ ആരാണെന്ന വിവരം ഇതുവരെ രഹസ്യമാക്കി വെച്ചിരിക്കുകയായിരുന്നു.
