കർക്കടക മാസം ആരോഗ്യസംരക്ഷണത്തിന് വളരെ പ്രധാനപ്പെട്ട ഒന്നാണ്. പരമ്പരാഗതമായി ആയുർവേദ രീതികൾ പിന്തുടരുന്ന ഈ മാസത്തിൽ ശരീരത്തിന്റെ പ്രതിരോധശേഷി വർദ്ധിപ്പിക്കാനും വാതസംബന്ധമായ അസുഖങ്ങളെ പ്രതിരോധിക്കാനും വിവിധ ഔഷധക്കൂട്ടുകൾ തയ്യാറാക്കി കഴിക്കുന്നത് പതിവാണ്. പണ്ടുകാലം മുതൽക്കേ നമ്മുടെ പൂർവ്വികർ ശീലമാക്കിയ അത്തരത്തിലുള്ള ഒരു പ്രധാന ഔഷധവിഭവമാണ് കർക്കടക ഉണ്ട.
ശരീരത്തിന് ആവശ്യമായ ഊർജ്ജവും ശക്തിയും പ്രദാനം ചെയ്യാൻ ഇത് ഏറെ സഹായിക്കുന്നു. ഇന്നത്തെ തിരക്കുപിടിച്ച ജീവിതശൈലിയിൽ ആരോഗ്യത്തോടെയിരിക്കാൻ ഈ പരമ്പരാഗത ഭക്ഷണരീതികൾ വീണ്ടും ആളുകൾ തേടിവരുന്നുണ്ട്. ഔഷധച്ചെടികളുടെ വേരുകൾ, തടികൾ, സുഗന്ധവ്യഞ്ജനങ്ങൾ എന്നിവ പൊടിച്ചെടുത്ത പ്രത്യേക കൂട്ടുകൾക്കൊപ്പമാണ് ഇത് തയ്യാറാക്കുന്നത്. ഇത് കഴിക്കുന്നത് വഴി ശരീരത്തിലെ ദഹനശക്തി വർദ്ധിക്കുകയും അസ്ഥികളുടെ ബലം മെച്ചപ്പെടുകയും ചെയ്യും.
കുട്ടികൾ മുതൽ മുതിർന്നവർ വരെയുള്ള എല്ലാവർക്കും ഇത് ഒരുപോലെ പ്രയോജനകരമാണ്. പ്രകൃതിദത്തമായ ചേരുവകൾ മാത്രം അടങ്ങിയിരിക്കുന്നതിനാൽ യാതൊരുവിധ പാർശ്വഫലങ്ങളും ഇതിലില്ല. തണുപ്പും മഴയും നിറഞ്ഞ കർക്കടക മാസത്തിൽ ശരീരത്തിന് ഉന്മേഷവും ചൂടും നൽകാൻ ഈ ഔഷധ ഉണ്ടകൾ മികച്ചൊരു ഔഷധക്കൂട്ടാണ്. ശ്രീജ തന്റെ യൂട്യൂബ് ചാനലിലൂടെയാണ് ഇത് തയ്യാറാക്കുന്ന വിധം പരിചയപ്പെടുത്തി തരുന്നത്.
ചേരുവകൾ
- ഞവര അരി- 250ഗ്രാം
- അയമോദകം- 50ഗ്രാം
- എള്ള്- 50ഗ്രാം
- ജീരകം- 25ഗ്രാം
- ആശാളി- 50ഗ്രാം
- ഉലുവ- 50ഗ്രാം
- ബദാം- 50ഗ്രാം
- ചുക്ക്- 1/4 ടീസ്പൂൺ
- ചിരകിയ തേങ്ങ- 2കപ്പ്
- നെയ്യ്- 2ടേബിൾസ്പൂൺ
- ശർക്കര- 400ഗ്രാം
- വെള്ളം-1/2 കപ്പ്
- ഏലയ്ക്ക-1/4 ടീസ്പൂൺ
തയ്യാറാക്കുന്ന വിധം
- അടി കട്ടിയുള്ള ഒരു പാത്രം അടുപ്പിൽ വച്ചു ചൂടാക്കാം. അതിലേയ്ക്ക് ഞവര അരി, അയമോദകം, എള്ള്, ജീരകം, ആശാളി, ഉലുവ, എന്നി വറുത്തു മാറ്റാം.
- ഇതിലേയ്ക്ക് ബദാമും ചുക്കും ചേർത്ത് വറത്തു മാറ്റാം. വറുത്തതെല്ലാം തണുത്ത് കഴിഞ്ഞ ശേഷം പൊടിച്ചെടുക്കാം.
- പാനിലേയ്ക്ക് 2 ടേബിൾ സ്പൂൺ നെയ്യ് ഒഴിച്ചു ചൂടാക്കാം. ഇതിലേയ്ക്ക് തേങ്ങ ചിരകിയതും ഏലയ്ക്കയും ചേർത്ത് ഇളക്കാം.
- മറ്റൊരു പാത്രത്തിൽ വെള്ളം ഒഴിച്ച് അതിലേയ്ക്ക് ശർക്കര കട്ടകളിട്ട് അലിയിച്ചെടുക്കാം.
- വെള്ളം വറ്റി ശർക്കര പാനിയായി വരുമ്പോൾ തണുക്കാൻ മാറ്റി വയ്ക്കാം. വേവിച്ചെടുത്ത തേങ്ങ അരച്ചെടുക്കാം.
- പൊടിച്ചു വച്ച് പൊടിയിലേയ്ക്ക് തേങ്ങ അരച്ചതു ചേർക്കാം. ഇതിലേയ്ക്ക് ശർക്കരപാനി ഒഴിച്ചിളക്കി യോജിപ്പിക്കാം. ശേഷം കൈകൾ ഉപയോഗിച്ച് ചെറിയ ഉരുളകളാക്കിയെടുക്കാം. ഇനി ഇഷ്ടാനുസരണം കഴിക്കാം.
