ചെന്നൈ: തമിഴ്നാട് ബിജെപി മുൻ അധ്യക്ഷൻ കെ അണ്ണാമലൈ രാജിക്കത്ത് സമർപ്പിച്ചു. ഡൽഹിയിലെത്തിയ അണ്ണാമലൈ ബിജെപി ദേശീയ അധ്യക്ഷൻ നിതിൻ നബിനെയും പാർട്ടിയുടെ ദേശീയ ജനറൽ സെക്രട്ടറി (സംഘടന) ബിഎൽ സന്തോഷിനെയും കണ്ട് രാജിക്കത്ത് സമർപ്പിച്ചു. അണ്ണാമലൈയുടെ രാഷ്ട്രീയ ഭാവിയെക്കുറിച്ചുള്ള അഭ്യൂഹങ്ങൾക്കിടയിലാണ് കൂടിക്കാഴ്ച നടന്നത്.
ബിജെപി ബന്ധം അവസാനിപ്പിക്കുന്നതോടെ പുതിയ രാഷ്ട്രീയ പാർട്ടി ആരംഭിക്കാനുള്ള നീക്കമാണ് ഐപിഎസ് മുൻ ഉദ്യോഗസ്ഥനായ അണ്ണാമലൈ ലക്ഷ്യമിടുന്നത്. ആറ് മുതൽ എട്ട് മാസത്തിനുള്ളിൽ പുതിയ പാർട്ടി പ്രഖ്യാപിച്ചേക്കും.
സംസ്ഥാന ബിജെപി നേതൃത്വവുമായുള്ള കടുത്ത എതിർപ്പിൻ്റെ പശ്ചാത്തലത്തിലാണ് അണ്ണാമലൈ പാർട്ടി വിടുന്നത്. അണ്ണാമലൈയും ബിജെപി കേന്ദ്ര നേതൃത്വവും തമ്മിൽ മാസങ്ങളായി നിലനിൽക്കുന്ന അഭിപ്രായവ്യത്യാസങ്ങളെ തുടർന്നാണ് ഈ സംഭവവികാസം. എഐഎഡിഎംകെയുമായുള്ള സഖ്യം പുനരുജ്ജീവിപ്പിക്കാനുള്ള ബിജെപിയുടെ തീരുമാനത്തിലും, കഴിഞ്ഞ നിയമസഭാ തെരഞ്ഞെടുപ്പിന് മുന്നോടിയായി നടന്ന സ്ഥാനാർഥി നിർണയത്തിലുമാണ് അണ്ണാമലൈയെ ചൊടിപ്പിച്ചത്.
എഐഎഡിഎംകെയുമായുള്ള സഖ്യത്തെ പ്രോത്സാഹിപ്പിക്കുന്നതിന് പകരമായി സംസ്ഥാനത്ത് സ്വതന്ത്രമായ ഒരു സംഘടനാ അടിത്തറ കെട്ടിപ്പടുക്കുന്നതിലാണ് ബിജെപി ശ്രദ്ധ കേന്ദ്രീകരിക്കേണ്ടതെന്ന് അണ്ണാമലൈ വാദിച്ചിരുന്നു. നടനും തമിഴക വെട്രി കഴകം നേതാവുമായ വിജയ് ഉണ്ടാക്കിയ രാഷ്ട്രീയ നേട്ടം അണ്ണാമലൈയെ സ്വാധീനിച്ചു.
നിരവധി യുവ പ്രൊഫഷണലുകളെയും യുവ വോട്ടർമാരെയും കന്നി വോട്ടർമാരെയും ഒപ്പം നിർത്താൻ സാധിക്കുമെന്നാണ് അണ്ണാമലൈ വിശ്വസിക്കുന്നത്. ബിജെപിയിൽ നിന്ന് ഔദ്യോഗികമായി പുറത്തുപോയാൽ മറ്റ് പാർട്ടികളിൽ നിന്നുള്ള നിരവധി പരിചയസമ്പന്നരായ നേതാക്കൾ തന്നോടൊപ്പം ചേരുമെന്ന് അദ്ദേഹം ആത്മവിശ്വാസം പ്രകടിപ്പിക്കുന്നുണ്ട്. പുതിയ പാർട്ടി രജിസ്റ്റർ ചെയ്യുന്നനും പാർട്ടിക്ക് പേരു നൽകുന്നതിനും അണ്ണാമലൈ നീക്കം ആരംഭിച്ച് കഴിഞ്ഞു. രാഷ്ട്രീയ പാർട്ടി പ്രഖ്യാപനത്തിനും രൂപീകരണത്തിനും മുന്നോടിയായി ഒരു സാമൂഹിക സംഘടന ആരംഭിച്ചേക്കാം.
അണ്ണാമലൈയുടെ പുതിയ പാർട്ടി പ്രഖ്യാപനം ഉടൻ ഉണ്ടാകാൻ സാധ്യത വിരളമാണെങ്കിലും നിർണായക തീരുമാനം വൈകാതെ ഉണ്ടാകും. തിങ്കളാഴ്ച കോയമ്പത്തൂരിലുടനീളം അണ്ണാമലൈയുടെ അനുയായികൾ കൂറ്റൻ പോസ്റ്ററുകൾ സ്ഥാപിച്ചു കഴിഞ്ഞു.
സിബിഎസ്ഇ ഒൻപതാം ക്ലാസ് വിദ്യാർഥികൾക്ക് ത്രിഭാഷാ ഫോർമുല നടപ്പിലാക്കാനുള്ള കേന്ദ്ര സർക്കാരിന്റെ തീരുമാനത്തെ അടുത്തിടെ വിമർശിച്ചതിനെത്തുടർന്ന് അണ്ണാമലൈയുടെ ഭാവിയെ ചുറ്റിപ്പറ്റിയുള്ള ഊഹാപോഹങ്ങൾ ശക്തമായിരുന്നു. യുവ വോട്ടർമാർക്കിടയിൽ പ്രത്യേകിച്ച് കന്നി വോട്ടർമാർക്കിടയിൽ നിന്നും ശക്തമായ പിന്തുണ സ്വന്തമാക്കാൻ സാധിക്കുമെന്ന വിശ്വാസത്തിലാണ് അണ്ണാമലൈ.
