തമിഴ്നാട് നിയമസഭാ തിരഞ്ഞെടുപ്പിൽ തൻ്റെ പേരിൽ മറ്റൊരാൾ വോട്ട് ചെയ്തതായി ആരോപിച്ച് നടി അക്ഷയ ഹരിഹരൻ രംഗത്ത്. ഈ അനുഭവം തന്നെ ‘ശരിക്കും ഞെട്ടിച്ചു’ എന്ന് താരം പ്രതികരിച്ചു. ചെന്നൈയിലെ അഡയാറിലെ തന്റെ പോളിംഗ് ബൂത്തിൽ വോട്ട് ചെയ്യാൻ എത്തിയപ്പോഴാണ് തനിക്ക് ഈ കാര്യം മനസ്സിലായതെന്ന് നടി പറഞ്ഞു.
തനിക്ക് വോട്ടർ സ്ലിപ്പ് ലഭിച്ചിരുന്നില്ലെന്നും ഓൺലൈൻ വഴിയാണ് ബൂത്ത് കണ്ടെത്തിയതെന്നും അക്ഷയ പറഞ്ഞു. എക്സിൽ പങ്കിട്ട ഒരു വീഡിയോയിൽ, തന്റെ വോട്ട് ഇതിനകം രേഖപ്പെടുത്തിയതായി അറിയിക്കുന്നതിന് മുമ്പ് ഒരു മണിക്കൂറോളം പോളിംഗ് സ്റ്റേഷനിൽ കാത്തിരുന്നതായി അക്ഷയ പറയുന്നു. രേഖപ്പെടുത്തിയിരിക്കുന്ന വിശദാംശങ്ങൾ തന്റേതാണെന്ന് അവർ അവകാശപ്പെട്ടു, പക്ഷേ ഫോട്ടോ മറ്റൊരാളുടേതായിരുന്നു.
വീഡിയോയിൽ പറയുന്നത് ഇങ്ങനെയാണ്; “ഹായ്, എന്റെ വോട്ട് മറ്റാരോ രേഖപ്പെടുത്തിയെന്ന് പറയാനാണ് ഞാൻ വീഡിയോയിൽ വന്നത്. ഇത് ശരിക്കും ഞെട്ടിക്കുന്നതാണ്. എന്റെ പേരും അച്ഛന്റെ പേരും (ഹരിഹരൻ) എല്ലാം രേഖകളിൽ കൃത്യമാണ്. എന്നാൽ ഫോട്ടോ മാത്രം മറ്റൊരാളുടേതാണ്. മറ്റൊരാൾക്ക് എങ്ങനെ എന്റെ പേരിൽ വോട്ട് ചെയ്യാൻ കഴിയും? ഉദ്യോഗസ്ഥർ ഇത് നേരത്തെ പരിശോധിക്കേണ്ടതായിരുന്നു.”
ബൂത്തിലെ രേഖകളിൽ തന്റെ പേരിന് നേരെ വിരലടയാളം പതിപ്പിച്ചിട്ടുണ്ടെന്നും ഇത് വെരിഫിക്കേഷൻ നടപടികളിലെ വീഴ്ചയാണെന്നും നടി ആരോപിച്ചു.
ടെൻഡർ വോട്ട് രേഖപ്പെടുത്തി
പ്രശ്നങ്ങൾക്കൊടുവിൽ അക്ഷയയെ ടെൻഡർ വോട്ട് ചെയ്യാൻ അനുവദിച്ചെങ്കിലും ആ നടപടിക്രമങ്ങളിൽ താരം അതൃപ്തി പ്രകടിപ്പിച്ചു. ഇതിൽ സുതാര്യത കുറവാണെന്ന് അവർ ചൂണ്ടിക്കാട്ടി. “അത് ഒരു പേപ്പർ മാത്രമായിരുന്നതിനാൽ എനിക്ക് അത് ഉചിതമല്ലെന്ന് തോന്നുന്നു, അവർ അത് എന്റെ മുന്നിൽ മുദ്രവെക്കുക പോലും ചെയ്തില്ല. എന്റെ ചോദ്യങ്ങൾക്ക് ആർക്കും ഉത്തരമില്ല. ഇത് ശരിക്കും നിരാശാജനകമാണ്,” റിട്ടേണിംഗ് ഓഫീസർക്ക് പരാതി നൽകാൻ പദ്ധതിയിടുന്നതായി അവർ കൂട്ടിച്ചേർത്തു.
വോട്ടിംഗ് മെഷീനിൽ അല്ലാതെ വോട്ട് ചെയ്തതിനാൽ താൻ വോട്ട് ചെയ്തതായി തോന്നുന്നില്ലെന്ന് ഇൻസ്റ്റാഗ്രാമിലെ കുറിപ്പിൽ അവർ കൂട്ടിച്ചേർത്തു. എങ്കിലും, ആരും തങ്ങളുടെ വോട്ട് ചെയ്യാതെ പാഴാക്കരുതെന്നും താരം ഓർമിപ്പിച്ചു.
ആരാണ് അക്ഷയ ഹരിഹരൻ?
സോഷ്യൽ മീഡിയയിലൂടെയും ഷോർട്ട്-ഫോം വീഡിയോ പ്ലാറ്റ്ഫോമുകളിലൂടെയും ശ്രദ്ധേയായ തമിഴ് നടിയും കണ്ടന്റ് ക്രിയേറ്ററുമാണ് അക്ഷയ ഹരിഹരൻ. ബ്ലഡി ബെഗ്ഗർ (2024), സത്യ (2024), സബ നായകൻ (2023) എന്നീ ചിത്രങ്ങളിലെ അഭിനയത്തിലൂടെയാണ് അവർ അറിയപ്പെടുന്നത്.
