തിരുവനന്തപുരം: കടുത്ത വേനൽചൂടിനെ തുടർന്ന് സംസ്ഥാനത്ത് വൈദ്യുതി ഉപയോഗം കുത്തനെ ഉയരുന്നതായി റിപ്പോർട്ട്. ഫാനും എയർ കണ്ടീഷണറും ദീർഘനേരം പ്രവർത്തിപ്പിക്കുന്നത് കൂടാതെ പാചകവാതക പ്രതിസന്ധിയും വൈദ്യുതി ഉപയോഗം വർധിക്കാൻ കാരണമായതായി വിദഗ്ദ്ധർ പറയുന്നു. നിലവിലെ നിലയിൽ ഉപയോഗം തുടർന്നാൽ അടുത്ത വൈദ്യുതി ബിൽ വരുമ്പോൾ പലർക്കും വലിയ ചെലവ് വരാനിടയുണ്ടെന്ന മുന്നറിയിപ്പും ഉയരുന്നു.
കഴിഞ്ഞ ഒരാഴ്ചയായി സംസ്ഥാനത്ത് വൈദ്യുതി ഉപഭോഗം ഗണ്യമായി വർധിച്ചിട്ടുണ്ട്. പീക്ക് സമയത്തെ ഉപയോഗത്തിന് പുറമേ എൽപിജി ലഭ്യതക്കുറവ് മൂലം വീടുകളിൽ വൈദ്യുതിയിൽ പ്രവർത്തിക്കുന്ന പാചക ഉപകരണങ്ങളുടെ ഉപയോഗവും കൂടിയിട്ടുണ്ട്. പ്രത്യേകിച്ച് ഇൻഡക്ഷൻ കുക്കറുകളുടെ ഉപയോഗമാണ് കൂടുതലായി വർധിച്ചിരിക്കുന്നത്.
ഇൻഡക്ഷൻ കുക്കറുകൾക്ക് പുറമെ മൈക്രോവേവ് ഓവൻ, ഹോട്ട് പ്ലേറ്റ്, എയർ ഫ്രയർ തുടങ്ങിയ ഉപകരണങ്ങളും കൂടുതൽ ഉപയോഗത്തിലായതോടെ വൈദ്യുതി ആവശ്യകതയും കൂടിയിരിക്കുകയാണ്. ഇവ പ്രവർത്തിപ്പിക്കാൻ കൂടുതൽ വൈദ്യുതി ആവശ്യമായതിനാൽ വീടുകളിലെ വൈദ്യുതി ചെലവ് ഉയരാൻ സാധ്യതയുണ്ട്.
ഈ ആഴ്ചയിൽ സംസ്ഥാനത്തെ പ്രതിദിന വൈദ്യുതി ഉപയോഗം 100 ദശലക്ഷം യൂണിറ്റ് കടന്നതായി കണക്കുകൾ വ്യക്തമാക്കുന്നു. ഈ വർഷം ഇതുവരെ രേഖപ്പെടുത്തിയ ഏറ്റവും ഉയർന്ന ഉപഭോഗമാണിത്. മുൻവർഷങ്ങളിൽ ഇടവിട്ട് മഴ ലഭിച്ചതിനാൽ ചൂട് കുറയുകയും താപനിലയിൽ വ്യത്യാസം അനുഭവപ്പെടുകയും ചെയ്തിരുന്നു. എന്നാൽ ഈ വർഷം കടുത്ത ചൂട് തുടരുന്നതിനാൽ വൈദ്യുതി ഉപയോഗം ഉയർന്ന നിലയിൽ തുടരുകയാണ്. ഇതിനൊപ്പം എൽപിജി പ്രതിസന്ധിയും സ്ഥിതി കൂടുതൽ സങ്കീർണ്ണമാക്കുകയാണ്.
