കരളിന് എന്തെങ്കിലും തകരാറ് സംഭവിച്ചാല്, അതിന്റെ പ്രവർത്തനത്തെ പതുക്കെ ബാധിച്ചു തുടങ്ങും. രോഗം മൂർച്ഛിക്കുമ്പോള് കരള് ചുരുങ്ങി, കല്ലുപോലെ ഉറപ്പുള്ളതായി മാറും.
ഈ അവസ്ഥയെയാണ് സിറോസിസ് എന്ന് പറയുന്നത്.
കരളിനെ ബാധിക്കുന്ന ഗുരുതര രോഗമാണ് ലിവര് സിറോസിസ്. ഇത് കരളിലെ ആരോഗ്യകരമായ കോശങ്ങളെ നശിപ്പിക്കുകയും കരളിന്റെ പ്രവർത്തനത്തെ ദോഷകരമായി ബാധിക്കുകയും ചെയ്യുന്നു.
ലിവർ സിറോസിസിന് പ്രധാനമായും നാല് ഘട്ടങ്ങളുണ്ട്. അവസാന ഘട്ടത്തിലെത്തിയവർക്ക് കരള് പൂർണ്ണമായും പ്രവർത്തനരഹിതമാകാനും ലിവർ ക്യാൻസർ വരാനുമുള്ള സാധ്യത വളരെ കൂടുതലാണ്. ഇവർക്ക് കരള് മാറ്റിവയ്ക്കല് ശസ്ത്രക്രിയ ആവശ്യമായി വന്നേക്കാം. സ്ഥിരമായ മദ്യപാനമാണ് സിറോസിസിന്റെ പ്രധാന കാരണം. ഹെപ്പറ്റൈറ്റിസ് ബി, ഹെപ്പറ്റൈറ്റിസ് സി തുടങ്ങിയ വൈറസ് അണുബാധകളും കരളിന് സ്ഥിരമായ വീക്കമുണ്ടാക്കി സിറോസിസിലേക്ക് നയിക്കാം. മദ്യപിക്കാത്തവരില് പ്രമേഹം, ഉയർന്ന കൊളസ്ട്രോള്, രക്തസമ്മർദ്ദം, കരളില് അമിതമായി കൊഴുപ്പ് അടിയുന്നത് എന്നിവയും സിറോസിസിന് കാരണമാകാറുണ്ട്.
കുടുംബത്തില് ആർക്കെങ്കിലും ഈ രോഗമുണ്ടെങ്കില്, പാരമ്പര്യ രോഗങ്ങള്, കരളില് ഇരുമ്പ്, ചെമ്പ് തുടങ്ങിയവ അമിതമായി അടിയുന്നത്, പിത്തനാളിയിലെ തടസ്സങ്ങള്, ചില മരുന്നുകളുടെ ഉപയോഗം, ഹൃദയസ്തംഭനം എന്നിവയും കരളിന്റെ പ്രവർത്തനം തകരാറിലാക്കാൻ കാരണമാകും.
രോഗം മൂർച്ഛിക്കുമ്പോഴാണ് ലക്ഷണങ്ങള് പ്രത്യക്ഷപ്പെടുക.ചർമ്മത്തിലെ ചൊറിച്ചില്, മഞ്ഞപ്പിത്തം, കാലുകളിലും വയറ്റിലും നീര്, വയറുവേദന, കടുത്ത ക്ഷീണം, വിശപ്പില്ലായ്മ, ഭാരം കുറയല്, ഓക്കാനം, ഛര്ദ്ദി എന്നിവയാണ് പ്രധാന ലക്ഷണങ്ങള്.
ലിവർ സിറോസിസ് പൂർണ്ണമായി ഭേദമാക്കാൻ കഴിയില്ല, പക്ഷേ രോഗം മൂർച്ഛിക്കുന്നത് തടയാനാകും. മദ്യപാനം പൂർണ്ണമായി നിർത്തുക, ഹെപ്പറ്റൈറ്റിസ് ബി, സി എന്നിവയ്ക്കെതിരെ വാക്സിൻ എടുക്കുക, മദ്യപാനം മൂലമല്ലാത്ത ഫാറ്റി ലിവർ ഉള്ളവർ ശരീരഭാരം കുറയ്ക്കുക, പ്രമേഹവും കൊളസ്ട്രോളും നിയന്ത്രിക്കുക എന്നിവ പ്രധാനമാണ്.
രോഗം ഗുരുതരമായവർക്ക് കരള് മാറ്റിവയ്ക്കല് ശസ്ത്രക്രിയ മാത്രമാണ് ഏക പോംവഴി. ആരോഗ്യമുള്ള കരള് മാറ്റിവയ്ക്കുന്നതിലൂടെ രോഗിയുടെ ജീവൻ രക്ഷിക്കാൻ സാധിക്കും.
