അമേരിക്കൻ പ്രസിഡന്റ് ഡൊണാൾഡ് ട്രംപ് റഷ്യയുടെ രണ്ട് ഏറ്റവും വലിയ എണ്ണക്കമ്പനികൾക്ക് ഉപരോധം ഏർപ്പെടുത്തി. യുക്രൈനിലെ യുദ്ധത്തിന് റഷ്യ പണം കണ്ടെത്തുന്നു എന്ന കാരണം ചൂണ്ടിക്കാട്ടിയാണ് ഈ നടപടി. റോസ്നെഫ്റ്റ് ഓയിൽ കമ്പനി, ലൂക്കോ എന്ന കമ്പനികൾക്കെതിരെയാണ് അമേരിക്ക ഉപരോധം ഏർപ്പെടുത്തിയിരിക്കുന്നത്.
വാഷിങ്ടൺ: യുക്രൈൻ – റഷ്യ യുദ്ധം അവസാനിപ്പിക്കുന്നതിൻ്റെ ഭാഗമായി പ്രധാന റഷ്യൻ എണ്ണക്കമ്പനികൾക്ക് ഉപരോധം ഏർപ്പെടുത്തി അമേരിക്കൻ പ്രസിഡന്റ് ഡൊണാൾഡ് ട്രംപ് . പ്രധാന റഷ്യൻ എണ്ണക്കമ്പനികളായ ഓപ്പൺ ജോയിന്റ് സ്റ്റോക്ക് കമ്പനി റോസ്നെഫ്റ്റ് ഓയിൽ കമ്പനി (Rosneft), ലൂക്കോയിൽ ഒഎഒ (Lukoil) എന്നിവർക്കെതിരെയാണ് ഉപരോധം ഏർപ്പെടുത്തിയതെന്ന് യുഎസ് ട്രഷറി ഡിപ്പാർട്ട്മെന്റ് പുറത്തിറക്കിയ പ്രസ്താവനയിൽ വ്യക്തമാക്കുന്നുണ്ട്.
യുക്രൈൻ യുദ്ധം അവസാനിപ്പിക്കാൻ റഷ്യ സമാധാന ചർച്ചകളിൽ ഗൗരവമായി ഇടപെടുന്നില്ലെന്നും ഈ സാഹചര്യത്തിലാണ് ഈ നടപടിയെന്നും ട്രഷറി ഡിപ്പാർട്ട്മെന്റ് അറിയിച്ചു. ഉപരോധം റഷ്യയുടെ ഊർജ്ജ മേഖലയിൽ സമ്മർദ്ദം ശക്തമാക്കും. റഷ്യയുടെ സാമ്പത്തിക വരുമാനത്തിന് തിരിച്ചടിയുണ്ടാക്കുകയും ചെയ്യും.
പെട്രോളിയം, പ്രകൃതിവാതകം, പെട്രോളിയം ഉത്പന്നങ്ങളുടെ ഖനനവും ഉത്പാദനവും, ശുദ്ധീകരണം, ഗതാഗതം, വിൽപ്പന എന്നിവയിൽ വൈദഗ്ദ്ധ്യം നേടി എണ്ണക്കമ്പനിയാണ് റോസ്നെഫ്റ്റ്. റഷ്യയിലും അന്താരാഷ്ട്ര തലത്തിലും എണ്ണ, വാതകങ്ങളുടെ കണ്ടെത്തൽ, ഉത്പാദനം, ശുദ്ധീകരണം, വിപണനം, വിതരണം എന്നിവയിൽ ഏർപ്പെട്ടിരിക്കുന്നു എണ്ണക്കമ്പനിയാണ് ലൂക്കോയിൽ ഒഎഒ എന്ന് ട്രഷറി ഡിപ്പാർട്ട്മെന്റ് വ്യക്തമാക്കുന്നുണ്ട്.
ഇന്ന് വളരെ വലിയ ദിവസമാണ്. നോക്കൂ, ഇതൊരു വലിയ ഉപരോധമാണ്. റഷ്യയുടെ രണ്ട് വലിയ എണ്ണക്കമ്പനികൾക്കെതിരെയാണ്. ഞങ്ങൾ യുദ്ധം അവസാനിക്കുമെന്ന് പ്രതീക്ഷിക്കുന്നു” – എന്ന് യുഎസ് പ്രസിഡൻ്റ് ഡൊണാൾഡ് ട്രംപ് പറഞ്ഞു. “കഴിഞ്ഞയാഴ്ച റഷ്യക്ക് ഏകദേശം 8,000 സൈനികരെ നഷ്ടപ്പെട്ടു. ധാരാളം റഷ്യക്കാരും യുക്രൈൻ പൗരന്മാരും കഴിഞ്ഞയാഴ്ച കൊല്ലപ്പെട്ടു. ഇത് വളരെ പരിഹാസ്യമാണ്, ഇത് അവസാനിക്കണമെന്ന് ഞങ്ങൾ ആഗ്രഹിക്കുന്നു. ഈ ഘട്ടത്തിൽ റഷ്യയും യുക്രൈനും സമാധാനം ആഗ്രഹിക്കുന്നുവെന്ന് ഞാൻ കരുതുന്നു. യുദ്ധം ഏകദേശം നാല് വർഷമായി. ഞാൻ പ്രസിഡന്റായിരുന്നെങ്കിൽ ഇത് ഒരിക്കലും ആരംഭിക്കുമായിരുന്നില്ല” – എന്ന് മാധ്യമപ്രവർത്തകരുമായി സംസാരിക്കുന്നതിനിടെ ട്രംപ് കൂട്ടിച്ചേർത്തു.
യുക്രൈൻ – റഷ്യ യുദ്ധം അവസാനിപ്പിക്കാനും ഉടനടി വെടിനിർത്തലിനും സമയമായെന്ന് യുഎസ് ട്രഷറി ഡിപ്പാർട്ട്മെന്റ് സെക്രട്ടറി സ്കോട്ട് ബെസെന്റ് പറഞ്ഞു. “ഈ അർഥമില്ലാത്ത യുദ്ധം അവസാനിപ്പിക്കാൻ റഷ്യൻ പ്രസിഡന്റ് വ്ലാഡിമിർ പുടിൻ വിസമ്മതിക്കുന്നതിനാൽ റഷ്യയ്ക്ക് യുദ്ധത്തിന് ധനസഹായം നൽകുന്ന റഷ്യയുടെ രണ്ട് ഏറ്റവും വലിയ എണ്ണക്കമ്പനികൾക്ക് ട്രഷറി ഉപരോധം ഏർപ്പെടുത്തുന്നു. പ്രസിഡന്റ് ട്രംപിന്റെ മറ്റൊരു യുദ്ധം അവസാനിപ്പിക്കാനുള്ള ശ്രമത്തെ പിന്തുണയ്ക്കാൻ ആവശ്യമെങ്കിൽ ട്രഷറി കൂടുതൽ നടപടികൾക്ക് തയ്യാറാണ്. ഞങ്ങളുടെ സഖ്യകക്ഷികളെ ഞങ്ങളോടൊപ്പം ചേരാനും ഈ ഉപരോധങ്ങൾ പാലിക്കാനും ഞങ്ങൾ പ്രോത്സാഹിപ്പിക്കുന്നു” – എന്ന് ബെസെന്റ് കൂട്ടിച്ചേർത്തു.
