സംസ്ഥാനത്തെ പ്രമുഖ യുവ രാഷ്ട്രീയ നേതാവിനെതിരെ ആരോപണവുമായി മുൻ മാധ്യമപ്രവർത്തകയും മോഡലുമായ റിനി ആൻ ജോർജ്ജ്. ഒരു പ്രമുഖ രാഷ്ട്രീയ യുവനേതാവ് തനിക്ക് മോശം സന്ദേശങ്ങൾ അയച്ചെന്ന് താരം ആരോപിച്ചു. ഹോട്ടലിലേക്ക് ക്ഷണിച്ചപ്പോൾ പാർട്ടി നേതൃത്വത്തെ വിവരമറിയിക്കുമെന്ന് പറഞ്ഞപ്പോൾ നേതൃത്വം അറിയുന്നതിൽ തനിക്ക് പ്രശ്നമില്ലെന്ന് നേതാവ് പറഞ്ഞതായും അവർ പറഞ്ഞു.
അതേസമയം ഈ യുവനേതാവിൻ്റെ പേരോ രാഷ്ട്രീയ പാർട്ടിയോ വെളിപ്പെടുത്താൻ റിനി തയ്യാറായിട്ടില്ല. എന്നാൽ, പാർട്ടിയിലെ മറ്റു പല സ്ത്രീകളും സമാനമായ അനുഭവങ്ങൾ നേരിട്ടിട്ടുണ്ടെന്നും, ഈ വിഷയത്തെക്കുറിച്ച് നേതാക്കളെ അറിയിച്ചിട്ടും അവർ പറഞ്ഞു. ഈ വിഷയത്തെ സംബന്ധിച്ച് നേതാക്കളെ അറിയിച്ചിരുന്നെങ്കിലും യുവ നേതാവിന് കൂടുതൽ സ്ഥാനമാനങ്ങൾ ലഭിച്ചുവെന്നും അവർ ആരോപിച്ചു. തനിക്കും സമാന അനുഭവം ഉണ്ടായതിനാലാണ് പൊതു ഇടത്തിൽ വന്ന് വെളിപ്പെടുത്താൻ തീരുമാനിച്ചതെന്നും താരം പറഞ്ഞു. രാഷ്ട്രീയക്കാർ കുടുംബത്തിലെ സ്ത്രീകളെ പോലും സംരക്ഷിക്കാൻ കഴിവില്ലാത്തവരാണെന്നും അവർ കൂട്ടിച്ചേർത്തു.
അതേസമയം, ആരോപിക്കപ്പെട്ട യുവ നേതാവ് പാലക്കാട് രാഹുൽ മാങ്കൂട്ടത്തിൽ ആണെന്ന് ആരോപിച്ച് ബിജെപി പാലക്കാട്ടെ എംഎൽഎ ഓഫീസിലേക്ക് മാർച്ച് നടത്തി. രാഹുൽ മാങ്കൂട്ടത്തിൽ നിലവിൽ യൂത്ത് കോൺഗ്രസിൻ്റെ സംസ്ഥാന പ്രസിഡന്റ് കൂടിയാണ്. പ്രവാസി എഴുത്തുകാരി ഹണി ഭാസ്കറും രാഹുൽ മാങ്കൂട്ടത്തിലിനെതിരെ രംഗത്തെത്തിയിട്ടുണ്ട്. അദ്ദേഹം സാമൂഹിക മാധ്യമങ്ങളിലൂടെ സന്ദേശങ്ങൾ അയച്ചെന്നും അവർ വിവിധ മാധ്യമങ്ങളോട് പ്രതികരിച്ചു.
