‘യാത്രാ വിപണിയുടെ ഓസ്കാർ’ എന്ന വിശേഷണം പേറുന്ന അവാർഡാണ് വേൾഡ് ട്രാവല്‍ അവാർഡ്സ് നൽകുന്ന ‘വേൾഡ്സ് ലീഡിങ് ലക്ഷ്വറി ട്രെയിൻ’ പുരസ്കാരം. എട്ടു തവണ ഈ പുരസ്കാരം നേടിയ ഒരേയൊരു ട്രെയിൻ മാത്രമേയുള്ളൂ, അത് ഇന്ത്യയുടെ മഹാരാജാസ് എക്സ്പ്രസ്സാണ്. ഏറ്റവുമൊടുവിൽ 2024ലും ‘വേൾഡ്സ് ലീഡിങ് ലക്ഷ്വറി ട്രെയിൻ’ പുരസ്കാരം മഹാരാജാസിനെ തേടിയെത്തി. യൂറോപ്യൻ രാജ്യങ്ങളും ജപ്പാനും ചൈനയുമടക്കമുള്ള രാജ്യങ്ങളെ മറികടന്നാണ് ഈ ഇന്ത്യൻ ട്രെയിനിന്റെ പ്രകടനം.
ഇന്ത്യൻ രാജകൊട്ടാരങ്ങളിലെ ആഡംബര സൗകര്യങ്ങളെ ഓർമ്മിപ്പിക്കുന്നതാണ് മഹാരാജാസ് എക്സ്പ്രസ്സിലെ സൗകര്യങ്ങൾ. അത്യാഡംബര സൗകര്യങ്ങളും, വ്യക്തിഗതമായി നല്‍കുന്ന സർവ്വീസിന്റെ ഗുണനിലവാരവുമെല്ലാം ഈ ട്രെയിനിനെ ഏറ്റവും മികച്ചതാക്കുന്നു. ഇതിനെക്കാളെല്ലാമുപരി മഹാരാജാസിനെ ഒന്നാം റാങ്കിലെത്തിക്കുന്നത് മറ്റൊരു വസ്തുതയാണ്. ഇന്ത്യയുടെ അതിമനോഹരമായ ടൂറിസം കേന്ദ്രങ്ങളിലൂടെയാണ് ട്രെയിനിന്റെ യാത്ര. രാജസ്ഥാൻ, ആഗ്ര, വാരാണസി തുടങ്ങിയ പൗരാണികഭംഗിയുള്ള ടൂറിസം കേന്ദ്രങ്ങളിലൂടെയാണ്. ഇക്കാരണത്താൽ യാത്രയുടെ മനോഹാരിത വർദ്ധിക്കുന്നു.
കാബിനുകളിലെല്ലാം വലിയ ചില്ല് ജനാലകളാണ് സ്ഥാപിച്ചിരിക്കുന്നത്. ഇവയിലൂടെ പുറത്തെ കാഴ്ചകൾ കണ്ടുള്ള യാത്ര അതിമനോഹരവും സുഖശീതളവുമാണ്. എൽസിഡി ടെലിവിഷനുകൾ, വൈഫൈ ആക്സസ്, വ്യക്തിഗത താപനിയന്ത്രണമുള്ള എസി സംവിധാനം തുടങ്ങിയവയുമുണ്ട്.
മഹാരാജാസ് ട്രെയിനിൽ ലോകത്തിലൊരിടത്തുമില്ലാത്ത മറ്റൊരു സൗകര്യം കൂടിയുണ്ട്. അത് പ്രസിഡൻഷ്യൽ സ്യൂട്ട് ആണ്. ഒരു ട്രെയിൻ കോച്ച് മുഴുവനും ഉൾക്കൊള്ളുന്നതാണ് മഹാരാജാസിലെ പ്രസിഡൻഷ്യൽ സ്യൂട്ട്. രണ്ട് ബെഡ്റൂമുകളും രണ്ട് വാഷ്റൂമുകളും ഇതിലുണ്ട്. നവരത്ന എന്നാണ് ഈ ട്രെയിൻ കാറിന് പേര്. ഈ സ്യൂട്ട് ബുക്ക് ചെയ്യുന്നവർക്ക് ട്രെയിൻ ഓരോ ടൂറിസ്റ്റ് കേന്ദ്രത്തിലെത്തുമ്പോഴും പുറത്ത് സഞ്ചരിക്കാൻ ആഡംബര കാർ സൗകര്യം നൽകും.
പ്രസിഡൻഷ്യൽ സ്യൂട്ടിനകത്ത് ഒരു മിനി ബാറും സജ്ജീകരിച്ചിട്ടുണ്ട്. ഒപ്പം ഒരു മിനി പാൻട്രി സൗകര്യവുമുണ്ട്. ഈ പാൻട്രിയിൽ ഒരു ഷെഫിനെയും അനുവദിക്കും. ഇഷ്ടമുള്ള വിഭവങ്ങൾ ഓർ‍ഡർ ചെയ്താൽ മതി, ഉണ്ടാക്കിത്തരും. യാത്രയിലുടനീളം പ്രസിഡൻഷ്യൽ സ്യൂട്ടിൽ സഞ്ചരിക്കുന്നവർക്കു വേണ്ടി വൈദ്യസഹായവും ട്രെയിനിനകത്ത് സജ്ജീകരിച്ചിരിക്കും.
പ്രസിഡൻഷ്യൽ സ്യൂട്ടിൽ നാലു പേർക്ക് യാത്ര ചെയ്യാനാണ് അനുവാദം ലഭിക്കുക. രണ്ട് ബെഡ്റൂം, ഒരു ലിവിങ് റൂം, സോഫ, എഴുത്തുമേശ, മിനി ബാർ, ലഗ്ഗേജ് ഹോൾഡ്, ഇലക്ട്രോണിക് സേഫ്, ലൈവ് ടെലിവിഷൻ, ഇന്റർനെറ്റ്, കാബിനിൽ നിയന്ത്രിക്കാവുന്ന ഏസി, കോംപ്ലിമെന്ററി ഡ്രിങ്ക്സ്, ബാത്ത് ടബ്ബ്, ഷവർ ക്യൂബിക്ക്ൾ തുടങ്ങിയ വേറെയും സൗകര്യങ്ങൾ ഇതിനകത്തുണ്ട്.
യൂറോപ്പിലെ വെനീസ് സിംപ്ലോൺ ഓറിയന്റ് എക്സ്പ്രസ് ട്രെയിൻ അതിന്റെ അത്യാഡംബര സൗകര്യങ്ങൾ കൊണ്ട് വിഖ്യാതമാണ്. മഹാരാജാതിനെപ്പോലെ തന്നെ എല്ലാ സുഖസൗകര്യങ്ങളും ഈ ട്രെയിനിലും കാണാം. എന്നാൽ, ലോകത്തിലെ ഏറ്റവും മികച്ച ആഡംബര ട്രെയിനെന്ന് വിളിക്കാൻ ആളുകൾ കൂടുതൽ പരിഗണിക്കുന്നത് മഹാരാജാസിനെയാണ്. ഇതിന് കാരണം മഹാരാജാസ് കടന്നുപോകുന്ന ചരിത്രസ്മാരകങ്ങളുടെ കൂടി ഭംഗിയാണ്. ഇത്രയും മനോഹാരിത വെനീസ് സിംപ്ലോൺ ഓറിയന്റ് എക്സ്പ്രസിലെ യാത്രയ്ക്ക് നൽകാൻ കഴിയില്ല. ജപ്പാനിലും ചൈനയിലുമെല്ലാം അത്യാഡംബര ട്രെയിനുകളോടുന്നു. ചൈനയിലെ ആഡംബര ട്രെയിനുകളിലൊന്നായ ഗോൾഡൻ ഈഗിൾ സിൽക്ക് റോഡ് എക്സ്പ്രസ് പുരാതനമായ സിൽക്ക് റൂട്ടിനെ കടന്നുപോകുന്നുണ്ട്. എന്നാൽ ഇതിലും മഹാരാജാസിന് കാട്ടിത്തരാൻ കഴിയുന്നത്ര മനോഹര കാഴ്ചകളില്ല.
