ബെയ്ജിംഗ്: ചൈനയിലെ വാക്സിൻ നിർമാതാക്കളായ കാൻസിനോ വികസിപ്പിച്ച കോവിഡ് പ്രതിരോധ വാക്സിന് സർക്കാർ പേറ്റന്‍റ് ലഭിച്ചു. എഡി 5-എൻകോവ് എന്ന വാക്സിനാണ് രാജ്യത്ത് പേറ്റന്‍റ് ലഭിച്ചത്. ഇതോടെ ചൈനയുടെ ആദ്യ കോവിഡ് പ്രതിരോധ വാക്സിൻ എന്ന പദവിയും എഡി 5-എൻകോവ് സ്വന്തമാക്കി. മാർച്ച് 18നാണ് പേറ്റന്‍റിനായി കന്പനി അപേക്ഷ നൽകിയത്. ഇതു പരിഗണിച്ച സർക്കാർ ഏജൻസി ആഗസ്റ്റ് 11ന് പേറ്റന്‍റ് നൽകിയതായാണ് റിപ്പോർട്ട്.
ജലദോഷം മൂലമുള്ള പനിയുണ്ടാക്കുന്ന വൈറസിൽ പുതിയ കൊറോണ വൈറസിന്‍റെ ജനിതകഘടകം കൂട്ടിച്ചേർത്തായിരുന്നു കാൻസിനോ ഗവേഷണം നടത്തിയത്. ഓക്സ്ഫോർഡ്, ആസ്ട്രാ സെനെക്ക വാക്സിൻ കണ്ടെത്താൻ ഉപയോഗിച്ച മാർഗം തന്നെയാണ് കാൻസിനോയും ഉപയോഗിച്ചത്. പ്രതിരോധ ശേഷി വർധിപ്പിക്കുന്ന ആന്‍റി ബോഡികളും ടി സെല്ലുകളും ഉൽപാദിപ്പിക്കാൻ വാക്സിനു കഴിഞ്ഞതായാണ് റിപ്പോർട്ടുകൾ.
