എറണാകുളം: കൊച്ചിയിൽ വെടിയുണ്ട ചട്ടിയിലിട്ട് ചൂടാക്കിയ പൊലീസുകാരനെതിരെ അന്വേഷണത്തിന് ഉത്തരവ്. എറണാകുളം എആർ ക്യാംപിലെ ആയുധപ്പുരയുടെ ചുമതലയുണ്ടായിരുന്ന റിസർവ്വ് സബ്ഇൻസ്പെക്ടർ സി വി സജീവിനെതിരെയാണ് അന്വേഷണം. റിപ്പോർട്ട് ലഭിച്ചശേഷമാകും തുടർനടപടികൾ സ്വീകരിക്കുക.
ഈ മാസം പത്തിനാണ് സംഭവം നടന്നത്. ഔദ്യോഗിക ബഹുമതിയോടുള്ള സംസ്കാര ചടങ്ങുകൾക്ക് ആകശത്തേക്ക് വെടിവയ്ക്കാൻ ഉപയോഗിക്കുന്ന ബ്ലാങ്ക് അമ്യൂണിഷൻ എന്ന വെടിയുണ്ടകളാണ് വൃത്തിയാക്കാനായി ചട്ടിയിലിട്ട് ചൂടാക്കിയത്. ഇടപ്പള്ളി സ്റ്റേഷനിലെ ഒരു പൊലീസ് ഉദ്യോഗസ്ഥന്റെ സംസ്കാര ചടങ്ങുകൾക്കുവേണ്ടി വെടിയുണ്ടെ എടുത്തപ്പോഴായിരുന്നു അഴുക്ക് പിടിച്ചിരിക്കുന്നത് ശ്രദ്ധയിൽപ്പെട്ടത്.
സാധാരണ ഇങ്ങനെയുള്ള സാഹചര്യത്തിൽ ഇത്തരത്തിലെ ഉണ്ടകൾ വെയിലത്തുവച്ച് ചൂടാക്കിയതിന് ശേഷമാണ് ഉപയോഗിക്കാറുള്ളത്. സംസ്കാരചടങ്ങിന് വേഗത്തിൽ പോകേണ്ടതിനാൽ, വെടിയുണ്ടകൾ എആർ ക്യാംപിലെ അടുക്കളയിൽവെച്ച് ചട്ടിയിലിട്ട് ചൂടാക്കുകയായിരുന്നു. ഇതോടെയാണ് ഉണ്ടകൾ പൊട്ടിത്തെറിച്ചത്.
