ഇന്ത്യൻ പ്രീമിയർ ലീഗിൽ ഏറ്റവും കൂടുതൽ കിരീടങ്ങൾ നേടിയ ടീമുകളിൽ ഒന്നാണ് ചെന്നൈ സൂപ്പർ കിങ്സ്. മഹേന്ദ്ര സിങ് ധോണിയുടെ ക്യാപ്റ്റൻസിയിൽ അഞ്ച് തവണയാണ് അവർ കിരീടത്തിൽ മുത്തമിട്ടത്. ഈ മാസം 22 ന് ആരംഭിക്കാനിരിക്കുന്ന പതിനെട്ടാം സീസൺ ഐപിഎല്ലിൽ ആറാം കിരീടം ലക്ഷ്യം വെച്ചാണ് സിഎസ്കെ ഇറങ്ങുന്നത്. മാർച്ച് 24 ന് ചിരവൈരികളായ മുംബൈ ഇന്ത്യൻസിന് എതിരെയാണ് സീസണിൽ ചെന്നൈയുടെ ആദ്യ മത്സരം.
മെഗാ ലേലം നടന്ന സാഹചര്യത്തിൽ വമ്പൻ മാറ്റങ്ങളുമായാണ് ഇത്തവണ ചെന്നൈ സൂപ്പർ കിങ്സ് കളിക്കുന്നത്. ഈ സാഹചര്യത്തിൽ 2025 സീസണിൽ ചെന്നൈയുടെ പ്ലേയിങ് ഇലവൻ എങ്ങനെയായിരിക്കുമെന്ന കാര്യത്തിൽ ആരാധകർക്ക് വലിയ ആകാംക്ഷയുണ്ട്. ഐപിഎല്ലിലെ ഇത്തവണത്തെ ആദ്യ കളിക്കുള്ള മുംബൈ ഇന്ത്യൻസിന്റെ സാധ്യത പ്ലേയിങ് ഇലവൻ എങ്ങനെയായിരിക്കുമെന്ന് നോക്കാം.
ക്യാപ്റ്റൻ റുതുരാജ് ഗെയിക്ക്വാദും ന്യൂസിലൻഡ് താരം ഡെവോൺ കോൺവെയും ചേർന്നാകും 2025 സീസൺ ഐപിഎല്ലിലെ ആദ്യ മത്സരത്തിൽ ചെന്നൈ സൂപ്പർ കിങ്സിന്റെ ബാറ്റിങ് ഓപ്പൺ ചെയ്യുക. മുൻസീസണുകളിൽ മികച്ച പ്രകടനം കാഴ്ച വെച്ച കൂട്ടുകെട്ടാണിത്. രാഹുൽ ത്രിപാതിയും, ശിവം ദുബെയും, ദീപക് ഹൂഡയുമാകും മധ്യനിരയിലെ താരങ്ങൾ. ഇതിൽ ത്രിപാതിയും, ഹൂഡയും മെഗാ താരലേലത്തിലൂടെ ഇത്തവണ ചെന്നൈയിൽ എത്തിയ താരങ്ങളാണ്.
വിക്കറ്റ് കീപ്പറായി മഹേന്ദ്ര സിങ് ധോണി തന്നെ ആദ്യ മത്സരത്തിൽ കളിക്കുമെന്നാണ് കരുതപ്പെടുന്നത്. ഓൾ റൗണ്ടർമാരായി രവീന്ദ്ര ജഡേജ, സാം കറൻ എന്നിവർ പ്ലേയിങ് ഇലവനിൽ ഉൾപ്പെട്ടേക്കും. ശ്രീലങ്കൻ പേസറായ മതീഷ പതിരാനയാകും ആദ്യ കളിയിൽ ചെന്നൈയുടെ പേസ് നിരയെ നയിക്കുക. ഇതിന് പുറമെ സ്പിന്നർമാരായി ആർ അശ്വിനും അഫ്ഗാനിസ്താന്റെ നൂർ അഹമ്മദും ഇറങ്ങിയേക്കും.
ചെന്നൈയുടെ സാധ്യത പ്ലേയിങ് ഇലവൻ: ഡെവോൺ കോൺവെ, റുതുരാജ് ഗെയിക്ക്വാദ്, രാഹുൽ ത്രിപാതി, ശിവം ദുബെ, ദീപക് ഹൂഡ, എം എസ്‌ ധോണി, രവീന്ദ്ര ജഡേജ, സാം കറൻ, ആർ അശ്വിൻ, നൂർ അഹമ്മദ്, മതീഷ പതിരാന.
