മലപ്പുറം: മലപ്പുറത്ത് വിവാഹ ചടങ്ങിനിടെ ഓഡിറ്റോറിയത്തിന്റെ ലിഫ്റ്റ് തകർന്നുവീണ് നാലുപേർക്ക് പരിക്ക്. പത്തപ്പിരിയം വി എ കണ്‍വൻഷൻ സെന്‍ററിലെ ലിഫ്റ്റാണ് തകർന്ന് വീണത്.
ഞായറാഴ്ച ഉച്ചയ്ക്ക് രണ്ട് മണിയോടെയായിരുന്നു സംഭവം. നെല്ലാണി സ്വദേശി കുഞ്ഞുമൊയിന്റെ മകളുടെ വിവാഹം നടക്കുമ്ബോഴാണ് അപകടം സംഭവിച്ചത്.
ഓഡിറ്റോറിയത്തിന്റെ മൂന്നാംനിലയില്‍ പ്രവർത്തിക്കുന്ന അടുക്കളയില്‍നിന്ന് ഭക്ഷണവും മറ്റും ലിഫ്റ്റില്‍ താഴേക്ക് ഇറക്കുകയാണ് പതിവ്. വരനും കൂട്ടരും മണ്ഡപത്തിലേക്ക് എത്തിയതോടെ ഇവർക്കുള്ള ജ്യൂസും വെള്ളവുമായി ലിഫ്റ്റില്‍ കയരിയ നാലുപേരാണ് അപകടത്തില്‍പ്പെട്ടത്. ലിഫ്റ്റിലുണ്ടായിരുന്ന വലിയപീടിക്കല്‍ മുഹമ്മദ് സഹിം (25), സഫ്വാൻ (26), നൗഷാദ് (40), ചുരക്കുന്നൻ നഫിഫ് (24) എന്നിവർക്കാണ് പരിക്കേറ്റത്.
ലിഫ്റ്റ് കമ്ബിപൊട്ടി താഴേക്ക് വീഴുകയായിരുന്നു. പരിക്കേറ്റവരെ ഉടൻ അരീക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്.
