കേരള റെയിൽ ഡെവലപ്പ്‌മെൻ്റ് കോർപറേഷന് ലിമിറ്റഡിന് (കെ റെയിൽ) ഇൻ്റർനാഷണൽ ഓർഗനൈസേഷൻ ഫോർ സ്റ്റാൻഡേർഡൈസേഷൻ്റെ (ഐഎസ്ഒ 9001–2015 ) സർട്ടിഫിക്കേഷൻ ലഭിച്ചു. സോഷ്യൽമീഡിയയിലൂടെ കെ റെയിൽ തന്നെയാണ് ഇക്കാര്യം അറിയിച്ചത്. ഗുണനിലവാര സർട്ടിഫിക്കേഷനാണ് ഐഎസ്ഒ. സംസ്ഥാന സർക്കാരിൻ്റെയും ഇന്ത്യൻ റെയിൽവേ മന്ത്രാലയത്തിൻ്റെയും സംയുക്ത സംരഭമാണ് കെ റെയിൽ.
അമൃത് ഭാരത് സ്റ്റേഷൻ സ്കീമിൽ ഉൾപ്പെടുന്ന തിരുവനന്തപുരം സെൻട്രൽ റെയിൽവേ സ്റ്റേഷൻ, വർക്കല ശിവഗിരി റെയിൽവേ സ്റ്റേഷൻ എന്നിവയുടെ നവീകരണ പദ്ധതികൾക്കും എറണാകുളം സൗത്ത്-വള്ളത്തോൾ നഗർ റെയിൽവേ സ്റ്റേഷനുകൾക്കിടയിൽ ഓട്ടമാറ്റിക് ബ്ലോക്ക് സിഗ്‌നലിങ്(എബിഎസ്) സ്ഥാപിക്കുന്നതിനും ഈയിടെ കരാർ ലഭിച്ചതു കെ റെയിൽ ഉൾപ്പെട്ട കൺസോർഷ്യത്തിനാണ്. 27 റെയിൽവേ മേൽപ്പാലങ്ങളുടെ നിർമാണചുമതലയും കെ റെയിലിനാണ്. വിവാദമായ ബൃഹദ് പദ്ധതി സിൽവർ ലൈൻ ഇപ്പോഴും പരിഗണനയിലാണ്.
സംസ്ഥാന സർക്കാരിൻ്റേയും ഇന്ത്യൻ റെയിൽവേ മന്ത്രാലയത്തിൻ്റെയും സംയുക്ത സംരംഭമാണു കെ റെയിൽ. റെയിൽ സൗകര്യ വികസനം, നടത്തിപ്പ്, പരിപാലനം, പദ്ധതികളുടെ സാധ്യതാ പഠന റിപ്പോർട്ട്, വിശദമായ രൂപരേഖ തയാറാക്കൽ, പ്രോജക്ട് മാനേജ്മെന്റ് കൺസൽറ്റൻസി, എൻജിനീയറിങ് കൺസൽറ്റൻസി എന്നിവയാണു കെ റെയിലിൻ്റെ പ്രധാന സേവന മേഖലകൾ.
