ഇന്ത്യയിൽ വിപണി മൂല്യത്തിൽ ഏറ്റവും മുന്നിലുള്ള കമ്പനിയായ റിലയൻസ് ഇൻഡസ്ട്രീസ് (BSE : 500325, NSE : RELIANCE) 2024 ജനുവരി – മാർച്ച് ത്രൈമാസ കാലയളവിലെ സാമ്പത്തിക ഫലം പ്രഖ്യാപിച്ചു. മാർച്ച് പാദത്തിൽ റിലയൻസിൻ്റെ മൊത്ത വരുമാനം 10.8 ശതമാനം വർധനയോടെ 2,64,834 കോടി രൂപ (31.8 ബില്യൺ ഡോളർ) ആയി ഉയർന്നു.
കമ്പനിയുടെ ഓയിൽ & ഗ്യാസ് വിഭാഗത്തിൽ നിന്നുള്ള വരുമാനത്തിൽ 42 ശതമാനം വർധന രേഖപ്പെടുത്തി.റിലയൻസിൻ്റെ ത്രൈമാസിക പ്രവർത്തനലാഭം 14.3 ശതമാനം ഉയർന്ന് 47,150 കോടി രൂപയായി (5.7 ബില്യൺ ഡോളർ). മാർച്ച് സാമ്പത്തിക പാദത്തിൽ റിലയൻസിൻ്റെ അറ്റാദായം 21,243 കോടി രൂപയായും (2.5 ബില്യൺ ഡോളർ) രേഖപ്പെടുത്തി.
കമ്പനിയുടെ എല്ലാ വിഭാഗം ബിസിനസുകളിൽ നിന്നും മികച്ച വരുമാനമാണ് ഇത്തവണ രേഖപ്പെടുത്തിയത്.മാർച്ച് സാമ്പത്തിക പാദത്തോ‌ടെ 2023-24 സാമ്പത്തിക വർഷത്തിനും പരിസമാപ്തിയായതോടെ, റിലയൻസ് ഇൻഡസ്ട്രീസിന്റെ വാർഷിക ഫലവും റിപ്പോർട്ട് ചെയ്തിട്ടുണ്ട്.
ഉപഭോക്തൃ ബിസിനസ് വിഭാഗങ്ങളിൽ തുടർച്ചയായി വളർച്ച രേഖപ്പെടുത്തുന്നതിന്റെ പിൻബലത്തിൽ റിലയൻസ് ഇൻഡസ്ട്രീസിന്റെ വാർഷിക സംയോജിത വരുമാനം 2.6 ശതമാനം വർധനയോടെ 10,00,122 കോടി (119.9 ബില്യൺ ഡോളർ) രൂപയായി ഉയർന്നു.
നികുതിക്കും പലിശയ്ക്കും മുൻപുള്ള ഏകീകൃത വരുമാനം അഥവാ പ്രവർത്തന ലാഭം 16.1 ശമാനം വർധനയോടെ 1,78,677 കോടി രൂപയായി (21.4 ബില്യൺ ഡോളർ). 2023-24 സാമ്പത്തിക വർഷം കമ്പനി നേടിയ അറ്റാദായം 7.3 ശതമാനം ഉയർന്നു 79,020 കോടി രൂപയിലെത്തി (9.5 ബില്യൺ ഡോളർ).
അതേസമയം 2023-24 സാമ്പത്തിക വർഷത്തെ അന്തിമ ലാഭവിഹിതവും റിലയൻസ് പ്രഖ്യാപിച്ചിട്ടുണ്ട്. ഓഹരിയൊന്നിന് 10 രൂപ വീതം ഡിവിഡ‍ന്റ് നൽകുമെന്നാണ് അറിയിപ്പ്.
റിലയൻസ് ജിയോ
ഇന്ത്യയിലെ ഏറ്റവും വലിയ ടെലികോം കമ്പനിയായ റിലയൻസ് ജിയോയുടെ മാർച്ച് സാമ്പത്തിക പാദത്തിലെ അറ്റാദായത്തിൽ 13 ശതമാനം വർധന. 2024 ജനുവരി – മാർച്ച് ത്രൈമാസ കാലയളവിലെ വരുമാനം മുൻവർഷത്തിലെ 4,716 കോടി രൂപയിൽ നിന്നും 5,337 കോടി രൂപയായി ഉയർന്നു. പ്രവർത്തനങ്ങളിൽ നിന്നുള്ള കമ്പനിയുടെ വരുമാനം 23,394 കോടി രൂപയിൽ നിന്നും 11 ശതമാനം വളർച്ചയോ‌ടെ 25,959 കോടി രൂപയായി വർധിച്ചു.
2023 – 2024 സാമ്പത്തിക വർഷത്തിൽ റിലയൻസ് ജിയോയുടെ അറ്റാദായം 12.4 ശതമാനം വർധിച്ചു 20,466 കോടി രൂപയായി രേഖപ്പെടുത്തി. അതുപോലെ 2024 മാർച്ചിൽ അവസാനിച്ച കഴിഞ്ഞ സാമ്പത്തിക വർഷത്തെ കമ്പനിയുടെ വരുമാനം 1,00,119 കോടി രൂപയായും വളർന്നു. വരുമാനത്തിൽ 10.2 ശതമാനം വാർഷിത വളർച്ചയാണ് കുറിച്ചിരിക്കുന്നത്.
