പ്രൊഫസർ ഷൈജ ആണ്ടവനെതിരായ പരാതികൾ അന്വേഷിക്കാൻ സമിതിയെ നിയോഗിച്ചു.

0
71

ഗോഡ്സെയെ പ്രകീർത്തിച്ച് ഫേസ്ബുക്ക് കമന്റിട്ട എൻഐടി പ്രൊഫസർ ഷൈജ ആണ്ടവനെതിരായ പരാതികൾ അന്വേഷിക്കാൻ സമിതിയെ നിയോഗിച്ചു. എൻഐടിയാണ് സമിതിയെ നിയോഗിച്ചത്. മഹാത്മാഗാന്ധി ഉയർത്തിപ്പിടിച്ച മൂല്യങ്ങൾക്ക് വിരുദ്ധമായ ഒരു അഭിപ്രായവും തങ്ങളംഗീകരിക്കില്ലെന്ന് എൻഐടി പറഞ്ഞു. സമിതിയുടെ നിര്‍ദ്ദേശങ്ങളനുസരിച്ച് നടപടി സ്വീകരിക്കുമെന്നും എൻഐടി വ്യക്തമാക്കി.

അതെസമയം ഷൈജ ആണ്ടവൻ നിലവിൽ കാമ്പസ്സിലേക്ക് വരുന്നില്ല. ഇക്കാരണത്താൽ മൊഴിയെടുക്കാൻ ഹാജരാകാനുള്ള നോട്ടീസ് കൈമാറാൻ കഴിയുന്നില്ലെന്ന് പോലീസ് പറയുന്നു. ഇവരെ ഫോണിൽ ബന്ധപ്പെടാൻ ശ്രമം നടത്തിയെങ്കിലും ലഭിച്ചില്ല. ഷൈജ ആണ്ടവൻ ഔദ്യോഗികമായി അവധിയപേക്ഷ നൽകിയിട്ടില്ലെന്നും റിപ്പോര്‍ട്ടുകളുണ്ട്. വിദ്യാർത്ഥി പ്രക്ഷോഭം ശക്തമായതിനെ തുടർന്നാണ് എൻഐടി അധികൃതർ നടപടിയെടുക്കാൻ നിർബന്ധിതരായത്.

നേരത്തെ രാമക്ഷേത്ര നിര്‍മ്മാണത്തിനെതിരെ പ്രതിഷേധിച്ച നാലാം വര്‍ഷ വിദ്യാര്‍ഥി വൈശാഖിനെ സസ്പെൻഡ് ചെയ്തിരുന്നു. ഈ നടപടി പുനപ്പരിശോധിക്കാനും തീരുമാനമായിട്ടുണ്ട്. ഇതിനായി ഉടനെ സെനറ്റ് യോഗം ചേരും. ഇലക്ട്രോണിക്‌സ് ആന്‍ഡ് ടെലി കമ്മ്യൂണിക്കേഷന്‍ വിദ്യാര്‍ഥി വൈശാഖ് പ്രേംകുമാറിനെ ഒരുവര്‍ഷത്തേക്കാണ് സസ്പെൻഡ് ചെയ്തത്.

ഗാന്ധിജിയുടെ കൊലയാളി ഇന്ത്യയെ രക്ഷിച്ചെന്ന് ഫേസ്ബുക്കിൽ കമന്റ് ചെയ്ത ഷൈജ ആണ്ടവനെ പുറത്താക്കണമെന്ന് ആവശ്യപ്പെട്ട് മിക്ക വിദ്യാർത്ഥി സംഘടനകളും രംഗത്തുണ്ട്. ഇതിനിടെ എബിവിപിയും പ്രതിഷേധവുമായി രംഗത്തെത്തിയത്. കൗതുകമുണർത്തിയിരുന്നു.

‘ഗോഡ്‌സെ ഇന്ത്യയെ രക്ഷിച്ചതില്‍ അഭിമാനമുണ്ടെ’ന്നായിരുന്നു ഷൈജ ആണ്ടവന്റെ കമന്റ്. ഗോഡ്സെയെ പ്രകീർത്തിച്ചതിൽ ഇവർ ഉറച്ചു നിൽക്കുകയും ചെയ്തു. എസ്എഫ്ഐ കുന്ദമംഗലം പോലീസിൽ നൽകിയ പരാതിയിൽ പോലീസ് കലാപാഹ്വാനത്തിന് കേസെടുത്തു. ഇതോടെ ഷൈജ ആണ്ടവൻ ഒളിവിൽ പോകുകയായിരുന്നു.

LEAVE A REPLY

Please enter your comment!
Please enter your name here