മലയാളത്തിലെ മുൻനിര ചലച്ചിത്ര നിർമ്മാണ സ്ഥാപനമായ ലിബർട്ടി പ്രൊഡക്ഷൻസ് (Liberty Productions) ഒരിടവേളക്കുശേഷം നിർമ്മാണ രംഗത്തേക്കു കടന്നു വരുന്നു. അബ്കാരി, ഇൻസ്പെക്ടർ ബൽറാം, നായർസാബ്, വർത്തമാനകാലം, പൂച്ചക്കാരു മണികെട്ടും, ബൽറാം Vs താരാദാസ് തുടങ്ങിയ ഹിറ്റ് ചിത്രങ്ങൾ നിർമ്മിക്കുകയും, കലാപരവും സാമ്പത്തികവുമായി മികച്ച വിജയം നേടിയ ബ്ലെസ്സി- മമ്മൂട്ടി ചിത്രമായ കാഴ്ച്ച, വിജി തമ്പിയുടെ സംവിധാനത്തിൽ സുരേഷ് ഗോപിനായകനായ ബഡാ ദോസ്ത് എന്നീ ചിത്രങ്ങൾ വിതരണം നടത്തുകയും ചെയ്തു കൊണ്ട് ലിബർട്ടി പ്രൊഡക്ഷൻസ് മലയാള സിനിമയിലെ മുൻനിര ചലച്ചിത്രനിർമ്മാണ സ്ഥാപനമായി മാറി.
വൻ മുതൽമുടക്കിൽ നിർമ്മിച്ച ബൽറാം Vട താരാദാസിനു ശേഷം നല്ലൊരു ഇടവേളയുണ്ടായി. ഈ ഇടവേള അവസാനിപ്പിച്ച് കൊണ്ടാണ് ലിബർട്ടി പ്രൊഡക്ഷൻസ് വീണ്ടും കടന്നു വരുന്നത്.
മറിമായം എന്ന ജനകീയ പരമ്പരയിലൂടെ ഏറെ ശ്രദ്ധേയരാവുകയും ഇപ്പോൾ പഞ്ചായത്തു ജെട്ടി എന്ന ചിത്രം സംവിധാനം ചെയ്തു വരികയും ചെയ്യുന്ന
മണികണ്ഠൻ പട്ടാമ്പി – സലിം ഹസൻ എന്നിവരാണ് ഈ ചിത്രം സംവിധാനം ചെയ്യുന്നത്.
ഇവരുടെ ഒരു ചിത്രം നിർമ്മിക്കണമെന്നത് തൻ്റെ ഏറെക്കാലത്തെ ആഗ്രഹമായിരുന്നു, അതാണ് ഇപ്പോൾ പ്രാവർത്തികമാകുന്നതെന്ന് നിർമ്മാതാവായ ലിബർട്ടി ബഷീർ പറഞ്ഞു. ചിത്രത്തിൻ്റെ വിശദാംശങ്ങൾ വൈകാതെ തന്നെ പുറത്തുവിടുമെന്നും ലിബർട്ടി ബഷീർ പറഞ്ഞു. മറ്റു പുതിയ ചിത്രങ്ങളും ആരംഭിക്കുന്നുണ്ട്. അതിൻ്റെ പ്രാരംഭ പ്രവർത്തനങ്ങൾ നടന്നുവരുന്നു.
