രാജസ്ഥാനിൽ ഭജൻ ലാൽ ശർമ്മയുടെ (Bhajan Lal Sharma) നേതൃത്വത്തിലുള്ള ബിജെപി സർക്കാരിന്റെ ആദ്യ മന്ത്രിസഭാ വികസനം (Rajasthan cabinet expansion) ഇന്ന് നടക്കും. പരിപാടിയിൽ പുതിയ മന്ത്രിമാർ സത്യപ്രതിജ്ഞ ചെയ്ത് അധികാരമേൽക്കും. വൈകിട്ട് 3.30ന് രാജ്ഭവനിൽ നടക്കുന്ന സത്യപ്രതിജ്ഞാ ചടങ്ങിൽ ഗവർണർ കൽരാജ് മിശ്ര (Kalraj Mishra) സത്യവാചകം ചൊല്ലിക്കൊടുക്കും. 20 ഓളം എംഎൽഎമാർ മന്ത്രിമാരായി സത്യപ്രതിജ്ഞ ചെയ്യുമെന്ന് വാർത്താ ഏജൻസിയായ എഎൻഐയോട് സംസാരിച്ച വൃത്തങ്ങൾ അറിയിച്ചു. നിയുക്ത മന്ത്രിമാരുടെ പേരുകൾ പാർട്ടി ഇതുവരെ വെളിപ്പെടുത്തിയിട്ടില്ല. മുതിർന്നവരും പുതുമുഖങ്ങളും ഇടകലർന്ന മന്ത്രിസഭയായിരിക്കുമെന്ന അഭ്യൂഹങ്ങളും പുറത്തുവരുന്നുണ്ട്.
മന്ത്രിസഭാ വിപുലീകരണത്തിന് മുന്നോടിയായി ഭജൻ ലാൽ ശർമ്മ ബിജെപി കേന്ദ്ര നേതാക്കളുമായി കൂടിക്കാഴ്ച നടത്തുന്നതിനായി ഡൽഹിയിലേക്ക് പോയിരുന്നു. 200 അംഗ സഭയിൽ 115 സീറ്റുകൾ നേടിയാണ് ബിജെപി അധികാരം പിടിച്ചെടുത്തത്. ദിയാ കുമാരിയും പ്രേംചന്ദ് ബൈർവയും ഉപമുഖ്യമന്ത്രിമാരായും തിരഞ്ഞെടുത്തിരുന്നു. ജനുവരി 19ന് ഗവർണറുടെ പ്രസംഗത്തോടെയാണ് രാജസ്ഥാനിലെ നിയമസഭാ സമ്മേളനം ആരംഭിക്കുക.
ഡിസംബർ 15നാണ് രാജസ്ഥാൻ മുഖ്യമന്ത്രിയായി ഭജൻ ലാൽ ശർമ്മ സത്യപ്രതിജ്ഞ ചെയ്ത് അധികാരമേറ്റത്. ആൽബർട്ട് ഹാളിന് മുന്നിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ബിജെപി അധ്യക്ഷൻ ജെ പി നദ്ദ, നിരവധി കേന്ദ്ര മന്ത്രിമാർ, വിവിധ സംസ്ഥാനങ്ങളിലെ മുഖ്യമന്ത്രിമാർ എന്നിവർ പങ്കെടുത്തിരുന്നു. രാജസ്ഥാനിലെ ഭരത്പൂർ സ്വദേശിയായ ഭജൻ ലാൽ ശർമ്മ, ആദ്യമായാണ് എംഎൽഎ ആകുന്നത്. രാഷ്ട്രീയ സ്വയം സേവക് സംഘ് (ആർഎസ്എസ്), അഖില ഭാരതീയ വിദ്യാർത്ഥി പരിഷത്ത് (എബിവിപി) എന്നിവയുമായി ബന്ധപ്പെട്ട് അദ്ദേഹം പ്രവർത്തിച്ചിട്ടുണ്ട്.
