മലയാളി നഴ്സിങ്ങ് വിദ്യാർഥിനിയെ ചെന്നൈയിൽ കാമുകൻ കഴുത്തുഞെരിച്ച് കൊലപ്പെടുത്തി. കൊല്ലം തെന്മല സ്വദേശിനിയായ പെൺകുട്ടിയാണ് കൊല്ലപ്പെട്ടത്.കൊല നടത്തിയതിന് പിന്നാലെ മൃതദേഹത്തിന്റെ ചിത്രം സമൂഹമാധ്യമങ്ങളിൽ പങ്കുവച്ചതോടെയാണ് വിവരം പുറത്തറിയുന്നത്. ചെന്നൈയിലെ ഒരു ഹോട്ടൽ മുറിയിൽ നിന്നുമാണ് വിദ്യാർഥിനിയുടെ മൃതദേഹം കണ്ടെത്തിയത്.സംഭവത്തിൽ വിദ്യാർഥിനിക്കൊപ്പമുണ്ടായിരുന്ന സുഹൃത്ത് കുളത്തൂപ്പുഴ അയ്യൻ പിള്ള വളവിനു സമീപമുള്ള ആഷിക് പൊലീസ് പിടിയിലായിട്ടുണ്ട്.
‘അഞ്ച് വർഷമായി തന്നെ ചതിക്കുകയായിരുന്നവളെ ഇല്ലാതാക്കി’ എന്ന് കഴിഞ്ഞദിവസം രാവിലെ സമൂഹമാധ്യമത്തിൽ ആഷിക് പോസ്റ്റിട്ടതോടെ യാണ് സുഹൃത്തുക്കൾ പെൺകുട്ടിയെ തേടിയെത്തുന്നതും കൊല്ലപ്പെട്ട വിവരം അറിയുന്നതും. വെള്ളിയാഴ്ച വൈകിട്ടോടെയാണ് സംഭവം.ഒറ്റക്കൽ ഗവ. ഹയർസെക്കൻഡറി സ്കൂളിൽ പഠിക്കുമ്പോഴാണ് ഇരുവരും സൗഹൃദത്തിലാകുന്നത്.
പിന്നീട്, പെൺകുട്ടി ചെന്നൈയിൽ നഴ്സിങ് പഠനത്തിനു പോയപ്പോഴും ഇവർ സൗഹൃദം തുടരുകയായിരുന്നു.കഴിഞ്ഞദിവസം, ഹോട്ടലിൽ മുറിയെടുത്തശേഷം ഇവർ തമ്മിൽ വാക്കുതർക്കമുണ്ടാകുകയായിരുന്നു. തുടർന്ന്, ബനിയൻ ഉപയോഗിച്ച് പെൺകുട്ടിയെ ആഷിക് കഴുത്തുഞെരിച്ച് കൊലപ്പെടുത്തുകയായിരുന്നെന്ന് പൊലീസ് പറയുന്നു.പ്രായപൂർത്തിയാകുന്നതിന് മുൻപ് തന്നെ ഇരുവരും വിവാഹം കഴിച്ചിരുന്നു.
ഇതിൽ ഒരു കുട്ടിയും ജനിച്ചിരുന്നുവെന്നും റിപ്പോർട്ടുണ്ട്. പ്രായപൂർത്തിയാകുന്നതിന് മുൻപ് വിവാഹം കഴിച്ചതിനാൽ ഇയാൾക്കെതിരെ പോക്സോ പ്രകാരം കേസെടുത്ത് ആഷിക്കിനെ അറസ്റ്റ് ചെയ്തിരുന്നു. ജാമ്യത്തിൽ ഇറങ്ങിയതിന് ശേഷമാണ് പെൺകുട്ടിക്കൊപ്പം താമസിക്കുന്നതിന് വേണ്ടി ചെന്നൈയിലേക്ക് പോകുകയായിരുന്നു. ഇയാൾക്ക് മറ്റ് സ്ത്രീകളുമായുള്ള അടുപ്പത്തെ ചൊല്ലിയാണ് തർക്കമുണ്ടായത്.
