ചൊവ്വാഴ്‌ച നഗരത്തിലെ വായു ഗുണനിലവാരം ‘വളരെ മോശം’ വിഭാഗത്തിലെത്തി. കഴിഞ്ഞ ദിവസത്തെ അപേക്ഷിച്ച് ഇത് മെച്ചപ്പെട്ട അവസ്ഥയാണ്. സെൻട്രൽ പൊല്യൂഷൻ കൺട്രോൾ ബോർഡിന്റെ (സിപിസിബി) കണക്കുകൾ പ്രകാരം നഗരത്തിന്റെ മൊത്തത്തിലുള്ള വായു ഗുണനിലവാര സൂചിക (എക്യുഐ) രാവിലെ 7 മണിക്ക് 396 ആണ്.എന്നാൽ നഗരത്തിലെ നിരവധി എയർ മോണിറ്ററിംഗ് സ്‌റ്റേഷനുകളിലെ എക്യുഐ ‘ഗുരുതര’ വിഭാഗത്തിലാണ് രേഖപ്പെടുത്തിയത്. ആനന്ദ് വിഹാറിലെ റിയൽ ടൈം മോണിറ്ററിംഗ് സ്‌റ്റേഷനിൽ 43ലും ഓഖ്‌ല ഫേസ് 2 (422), രോഹിണി (444), പഞ്ചാബി ബാഗ് (437) എന്നിവിടങ്ങളിൽ എക്യുഐ ഗുരുതര സാഹചര്യം ചൂണ്ടിക്കാട്ടി.കനത്ത മൂടൽമഞ്ഞ് ചൊവ്വാഴ്‌ചയും ഡൽഹിയിൽ വെല്ലുവിളിയാവുകയാണ്. ഇന്നലെ, ഡൽഹിയുടെ മൊത്തത്തിലുള്ള വായു ഗുണനിലവാര സൂചിക (എക്യുഐ) 437 രേഖപ്പെടുത്തിയതോടെ ‘ഗുരുതര’ വിഭാഗത്തിലായിരുന്നു.
പൂജ്യത്തിനും 50നും ഇടയിലുള്ള എക്യുഐ നല്ലത്, 51നും 100നും ഇടയില്‍ തൃപ്‌തികരം, 101നും 200നും ഇടയില്‍ മിതമായത്, 201നും 300 നും ഇടയില്‍ മോശം, 301നും 400നും ഇടയില്‍ വളരെ മോശം 401നും 500നും ഇടയില്‍ കഠിനമായത് എന്നിങ്ങനെയാണ് വായുഗുണ നിലവാരം കണക്കാക്കുന്നത്.നഗരത്തിലെ മലിനീകരണ പ്രതിസന്ധിയെക്കുറിച്ച് ചർച്ച ചെയ്യാൻ ഡൽഹി മുഖ്യമന്ത്രി അരവിന്ദ് കെജ്‌രിവാളിന്റെ നേതൃത്വത്തിൽ കഴിഞ്ഞ ദിവസം ഉന്നതതല യോഗം ചേർന്നിരുന്നു.
ഡൽഹി പരിസ്ഥിതി മന്ത്രി ഗോപാൽ റായിയും ബന്ധപ്പെട്ട വകുപ്പുകളിലെ മുതിർന്ന ഉദ്യോഗസ്ഥരും യോഗത്തിൽ പങ്കെടുത്തു.വായുവിന്റെ മോശം ഗുണനിലവാരം കണക്കിലെടുത്ത് ഡൽഹിയിൽ നവംബർ 13 മുതൽ നവംബർ 20 വരെ ഒറ്റ-ഇരട്ട കാർ പദ്ധതി നടപ്പാക്കും.ഡൽഹിയിലെ പ്രൈമറി സ്‌കൂളുകൾ നവംബർ 10 വരെ അടച്ചിടും. 6-12 ഗ്രേഡുകളിലെ വിദ്യാർത്ഥികൾക്ക്, സ്‌കൂളുകൾക്ക് അവരുടെ ക്ലാസുകൾ ഓൺലൈനായി മാറ്റാനുള്ള അനുമതി നൽകിയിട്ടുണ്ട്.
നേരത്തെ, ദേശീയ തലസ്ഥാനത്തെ സ്‌കൂളുകൾ നവംബർ 4 വരെ അടച്ചിടാൻ ഉത്തരവിട്ടിരുന്നു.എൻസിആറിൽ വർദ്ധിച്ചുവരുന്ന മലിനീകരണത്തിൽ നിന്ന് കുട്ടികളെ സംരക്ഷിക്കാൻ ഇനിയൊരു ഉത്തരവ് ഉണ്ടാകുന്നത് വരെ ഗുരുഗ്രാമിൽ പ്രൈമറി സ്‌കൂളുകൾ (നഴ്‌സറി മുതൽ ക്ലാസ് വരെ) അടച്ചിടാൻ ഉത്തരവിട്ടു. അതുപോലെ, ഫരീദാബാദിൽ ചൊവ്വാഴ്‌ച മുതൽ 1 മുതൽ 5 വരെ ക്ലാസ് വരെയുള്ള കുട്ടികൾക്ക് ഒക്ടോബർ 12 വരെ അവധിയായിരിക്കും.ഡൽഹി-എൻസിആറിൽ ജിആർഎപി 4 നിയന്ത്രണങ്ങൾ ഏർപ്പെടുത്തിയതോടെ, നോയിഡയിൽ നിന്ന് തലസ്ഥാനത്തേക്ക് അവശ്യേതര വസ്‌തുക്കളുമായി വരുന്ന ട്രക്കുകളുടെ പ്രവേശനം നിരോധിക്കുകയും ഗൗതം ബുദ്ധ നഗറിൽ BS-III (പെട്രോൾ), BS-IV (ഡീസൽ) വാഹനങ്ങൾ ഓടുന്നതിന് നിയന്ത്രണങ്ങൾ ഏർപ്പെടുത്തുകയും ചെയ്‌തു.
