തിരുവനന്തപുരം: ഉന്നതി വിദേശ പഠന സ്‌കോളര്‍ഷിപ്പ് മുഖേനെ കഴിഞ്ഞ രണ്ടു വര്‍ഷത്തിനിടെ 425 കുട്ടികളെ വിദേശത്തേക്ക് അയക്കാനായെന്ന് മന്ത്രി കെ രാധാകൃഷ്ണന്‍. ഈ വര്‍ഷം 310 കുട്ടികള്‍ക്ക് വിദേശ പഠനത്തിന് സ്‌കോളര്‍ഷിപ്പ് നല്‍കും. കുടുതല്‍ പഠനാവസരങ്ങള്‍ക്കൊപ്പം അവരുടെ കരിയര്‍ സാധ്യതകളും വിദേശ പഠനത്തിലൂടെ വിപുലമാക്കാനാകുമെന്ന് മന്ത്രി പറഞ്ഞു.സമര്‍ത്ഥരും പ്രതിഭാശേഷിയുമുള്ള പട്ടിക വിഭാഗം വിദ്യാര്‍ഥികള്‍ക്ക് വിദേശ സര്‍വ്വകലാശാല കളില്‍ പോയി ബിരുദാനന്തര തലത്തിലുള്ള (അല്ലെങ്കില്‍ അതിന് മുകളിലുള്ള) കോഴ്സുകള്‍ പഠിക്കുന്നതിനായുള്ള സ്കോളർഷിപ്പാണ് ഉന്നതി.
വിജ്ഞാനത്തിന്റെ വിശാലമായ ആഗോള മേഖലയിലേക്ക് പട്ടികജാതി – പട്ടിക വര്‍ഗ മേഖലയിലെ വിദ്യാര്‍ഥികളുടെ പ്രവേശനം ഉറപ്പാക്കുകയാണ് പദ്ധതിയുടെ ലക്ഷ്യമെന്ന് മന്ത്രി കെ രാധാകൃഷ്ണന്‍ പറഞ്ഞു.കോഴ്സുകളുടെ തെരഞ്ഞെടുപ്പ്, സ്ഥാപനം നല്‍കുന്ന അവസരങ്ങള്‍, നമ്മുടെ രാജ്യത്തിനകത്തും പുറത്തുമുള്ള കോഴ്സിന്റെ പ്രസക്തിയും സ്വീകാര്യതയും, അക്കാദമിക് വളര്‍ച്ച, തൊഴില്‍ സാധ്യതകള്‍, വിദ്യാര്‍ഥിക്കും കുടുംബത്തിനും പ്രതീക്ഷിക്കുന്ന ഭൗതിക നേട്ടങ്ങള്‍ എന്നിവ സ്‌കോളര്‍ഷിപ്പിന് പരിഗണിക്കുന്ന പ്രസക്തമായ ഘടകങ്ങളാണ്.പട്ടിക വര്‍ഗ്ഗ, പട്ടികജാതി വികസന വകുപ്പുകള്‍ Overseas Development and Employment Promotion Consultants (ODEPC) ന്റെ സഹകരണത്തോടെയാണ് പദ്ധതി നടപ്പിലാക്കുന്നത്. സ്‌കോളര്‍ഷിപ്പ് ഇനത്തില്‍ പരമാവധി 25 ലക്ഷം രൂപ ലഭ്യമാകും. യോഗ്യത 55 ശതമാനം മാര്‍ക്കില്‍ കുറയാതെയുള്ള അംഗീകൃത ബിരുദമാണ്.
പ്രായപരിധി 35 വയസ്സില്‍ താഴെയാകണം. വിദേശത്ത് ഉപരിപഠനത്തിനുള്ള ഉന്നതി സ്‌കോളര്‍ഷിപ്പിന്റെ മാര്‍ഗ നിര്‍ദ്ദേശങ്ങള്‍ സര്‍ക്കാര്‍ ഉത്തരവ് ജി ഒ (എംഎസ്) 22/2023/SCSTD തീയ്യതി: 01.08.2023 പ്രകാരം വ്യക്തമാക്കിയിട്ടുണ്ട്. സ്‌കോളര്‍ഷിപ്പിനായി രജിസ്റ്റര്‍ ചെയ്യാന്‍ https://unnathikerala.org/ ലിങ്ക് ഉപയോഗിക്കാം. കൂടുതല്‍ വിവരങ്ങള്‍ക്ക് 6282631503, 9496070326 എന്ന നമ്പറുകളിലോ പട്ടികവര്‍ഗ്ഗ വികസന വകുപ്പിന്റെ www.stdd.kerala.gov.in എന്ന വെബ് സൈറ്റിലോ, പട്ടികജാതി വികസന വകുപ്പിന്റെ www.scdd.kerala.gov.in എന്ന വെബ് സൈറ്റിലോ, unnathi@odepc.in എന്ന മെയില്‍ ഐഡിയിലോ ബന്ധപ്പെടാവുന്നതാണ്.
