ട്രാൻസ്‌ജെൻഡേഴ്‌സിനൊപ്പം ഓണം ആഘോഷിച്ച് നടനും മുൻ എംപിയുമായ സുരേഷ് ഗോപി. ഓണാഘോഷത്തിൽ പങ്കെടുത്ത മുഴുവൻ വ്യക്തികൾക്കും അദ്ദേഹം ഓണക്കോടി സമ്മാനിക്കുകയും ചെയ്തു. കൂടാതെ ട്രാൻസ്‌ജെൻഡറുകൾക്ക് മുന്നിൽ തലകുനിച്ച് അനുഗ്രഹം തേടുകയും ചെയ്തു.
മുംബൈ ആസ്ഥാനമായ പ്രതീക്ഷ ഫൗണ്ടേഷന്റേയും നിലാ ചാരിറ്റബിൾ സൊസൈറ്റിയുടേയും ആഭിമുഖ്യത്തിലായിരുന്നു പരിപാടി. ട്രാൻസ് വ്യക്തികൾക്ക് ഓണസദ്യ വിളമ്പി നൽകുകയും ചെയ്തു. താൻ ആദ്യമായാണ് ഇവരുമായി ഇത്രയും ചേർന്ന് നിൽക്കുന്നതെന്ന് സുരേഷ് ഗോപി പറഞ്ഞു.
‘എന്റെ ഗുരു എനിക്ക് പറഞ്ഞ് തന്നതാണ് ഞാൻ ഇവിടെ ചെയ്തത്. ഇതാദ്യമായാണ് ഇവരുമായി ഇത്രയും ചേർന്ന് നിൽക്കുന്നതും ചേർത്തു പിടിക്കുന്നതും. ഇവരുടെ കൈകളിലേക്ക് സന്തോഷം പകർത്തുന്നതിന് വേണ്ടി എന്താണ് ഇവരുടെ ഹൃദയത്തിലേക്ക് പകർന്നു നൽകാൻ പറ്റുക. അവരുടെ പാദം തൊട്ട് നമസ്‌കരിച്ചതും അതുകൊണ്ടാണ്. എല്ലാവർക്കും ഇവിടെ തുല്യത വേണം. അവിടെ ജാതി, മതം ഒന്നും ഇടകലർത്തരുത്. ആ തത്വം ഇവിടെ ആഘോഷിക്കപ്പെടുകയാണ്.”സുരേഷ് ഗോപി പറഞ്ഞു.
ട്രാൻസ്ജെൻഡർ സമൂഹത്തിന്റെ ഉന്നമനത്തിന് വേണ്ടിയുളള എല്ലാ സഹായവും നൽകുമെന്ന് തൃശൂർ കൗസ്തുഭം ഓഡിറ്റോറിയത്തിൽ സംഘടിപ്പിച്ച ചടങ്ങിൽ സുരേഷ് ഗോപി പറഞ്ഞു. സിവിൽ സർവീസ് സ്വപ്നം കാണുന്ന അഭിരാമി എന്ന വിദ്യാർഥിക്ക് അതിന്റെ പഠനത്തിനായുളള സഹായവും സുരേഷ്ഗോപി പ്രഖ്യാപിച്ചു.
