മിത്ത് പരാമർശ വിവാദത്തിനിടെ ‘ജയ് ഗണേഷ്’ എന്ന പേരിൽ പുതിയ സിനിമ പ്രഖ്യാപിച്ച് നടൻ ഉണ്ണി മുകുന്ദൻ. രഞ്ജിത് ശങ്കർ സംവിധാനം ചെയ്യുന്ന ചിത്രം ഒറ്റപ്പാലത്തെ ഗണേശോത്സവ വേദിയിൽവെച്ച് ഉണ്ണി മുകുന്ദൻ പ്രഖ്യാപിച്ചത്. രഞ്ജിത് ശങ്കറും ഫെയ്സ്ബുക്കിലൂടെ ചിത്രത്തേക്കുറിച്ചുള്ള വിവരം പങ്കുവെച്ചിട്ടുണ്ട്.
ജയ് ഗണേശിന്റെ തിരക്കഥ പൂർത്തിയാക്കിയ ശേഷം ഈ വേഷം അവതരിപ്പിക്കാനുള്ള ഒരു നടനായുള്ള തിരച്ചിലിലായിരുന്നു താനെന്നാണ് നായകനായി ഉണ്ണി മുകുന്ദനിലേക്ക് എത്തിയതിനേക്കുറിച്ച് രഞ്ജിത് ശങ്കർ ഫെയ്സ്ബുക്കിൽ കുറിച്ചത്.
മാളികപ്പുറം പുറത്തിറങ്ങിയശേഷം ഏഴുമാസത്തിനിടെ ഉണ്ണിയുടേതായി ഒരു സിനിമയും ചിത്രീകരിച്ചിട്ടില്ല. ശരിയായ തിരക്കഥയ്ക്കായി അദ്ദേഹം കാത്തിരിക്കുകയായിരുന്നു. ഞങ്ങൾ ജയ് ഗണേഷിനേക്കുറിച്ച് ചർച്ച ചെയ്തു. തിരക്കഥ അദ്ദേഹത്തിന് ഇഷ്ടമായി. ഞാൻ എന്റെ നടനേയും കണ്ടെത്തി. ഞങ്ങൾ ഇരുവരും ചേർന്നാണ് ചിത്രം നിർമിക്കുന്നത്. ഈ വഴിയിലെ ഓരോ ചുവടും ആസ്വദിക്കുമെന്നാണ് പ്രതീക്ഷിക്കുന്നതെന്നും രഞ്ജിത് ശങ്കർ കുറിച്ചു.
