ഉപയോക്താക്കളുടെ എല്ലാ ആവശ്യങ്ങൾക്കും പരിഹാരമായി പ്രവർത്തിക്കുന്ന ‘എക്‌സ് ആപ്പ്’ സൃഷ്‌ടിക്കുന്നതിനെക്കുറിച്ച് ഇലോൺ മസ്‌ക് വളരെക്കാലമായി സംസാരിച്ചുകൊണ്ടിരിക്കുകയാണ്. പണമിടപാടുകൾ നടത്താനും സിനിമാ ടിക്കറ്റുകൾ ബുക്ക് ചെയ്യാനും മറ്റും ഉപയോക്താക്കളെ അനുവദിക്കുന്ന ചൈനയുടെ വീചാറ്റ് ആപ്പിന് സമാനമായിരിക്കും ഇത്.
തുടക്കം മുതൽ മൈക്രോ-ബ്ലോഗിംഗ് സൈറ്റായിരുന്ന ട്വിറ്റർ, ഘട്ടം ഘട്ടമായി എക്‌സിലേക്ക് മാറി കൊണ്ടിരിക്കുകയാണ്. ഏറ്റവും പുതിയ റിപ്പോർട്ടുകൾ പ്രകാരം, പ്ലാറ്റ്‌ഫോം ഉടൻ തന്നെ ഓൺലൈനിൽ ജോലികൾ കണ്ടെത്താൻ ഉപയോക്താക്കളെ അനുവദിക്കും.
ട്വിറ്റർ ഉപയോക്താക്കൾക്ക് ജോലികൾ തിരയാം
ലിങ്ക്ഡ്ഇൻ, നൗക്രി.കോം പോലുള്ള പോർട്ടലുകളുമായി മത്സരിക്കാനുള്ള ശ്രമമാണ് മസ്‌കിന്റെ എക്‌സ് ആരംഭിക്കുന്നത്. വൈകാതെ ഉപയോക്താക്കളെ ജോലി ഒഴിവുകൾ ഓൺലൈനിൽ തിരയാൻ ആപ്പ് അനുവദിച്ചേക്കാം. പ്ലാറ്റ്‌ഫോം പരിശോധിച്ചുറപ്പിച്ച സ്ഥാപനങ്ങൾക്ക് സോഷ്യൽ മീഡിയ സൈറ്റിൽ ജോലികൾ ലിസ്‌റ്റ് ചെയ്യാൻ കഴിയുമെന്ന് ഏകദേശം ഒരു മാസം മുമ്പ് റിപ്പോർട്ട് പുറത്തുവന്നിരുന്നു. അഞ്ച് ഓപ്പൺ റോളുകൾ വരെ ലിസ്‌റ്റ് ചെയ്യാൻ ഓർഗനൈസേഷനുകൾക്ക് കഴിയുമെന്നും റിപ്പോർട്ടുകളുണ്ട്.
വൈകാതെ ട്വിറ്റർ ഉപയോക്താക്കൾക്ക് ഉടൻ തന്നെ ഒരു ജോബ് സെർച്ച് ഫീച്ചറിലേക്ക് ആക്‌സസ് ലഭിക്കുമെന്നും, അതിലൂടെ അവർക്ക് പ്ലാറ്റ്‌ഫോം വഴി ജോലി കണ്ടെത്താൻ കഴിയുമെന്നും ഐഎഎൻഎസ് റിപ്പോർട്ടിൽ പറയുന്നു.
എക്‌സ് ഹൈറിംഗ് എന്ന ഹാൻഡിൽ ഇതിനകം തന്നെ ജോലി ഒഴിവുകൾ പോസ്‌റ്റ് ചെയ്യാൻ തുടങ്ങിയെന്ന് ട്വിറ്ററുമായി ബന്ധപ്പെട്ട വാർത്തകൾ ഉൾക്കൊള്ളുന്ന അക്കൗണ്ടായ എക്‌സ് ഡെയ്‌ലി പറയുന്നു.
എന്നിരുന്നാലും, ഇപ്പോൾ ഇവ വെബിലും യുഎസിലും മാത്രമേ ദൃശ്യമാകൂ. മറ്റിടങ്ങളിലേക്ക് കൂടി വൈകാതെ ഇത് വ്യാപിച്ചേക്കുമെന്നാണ് സൂചന.
