അസമിലെ പാർലമെന്റ്, നിയമസഭാ മണ്ഡലങ്ങളുടെ അതിർത്തി നിർണയത്തിന് രാഷ്ട്രപതി ദ്രൗപതി മുർമു അംഗീകാരം നൽകി. ഇത് സംസ്ഥാന ചരിത്രത്തിന്റെ ഒരു സുപ്രധാന നാഴികക്കല്ലാണെന്ന് ഗസറ്റ് വിജ്ഞാപനം പങ്കുവെച്ചുകൊണ്ട് മുഖ്യമന്ത്രി ഹിമന്ത ബിശ്വ ശർമ്മ പറഞ്ഞു.
“ഇന്ന് ബഹുമാനപ്പെട്ട രാഷ്ട്രപതി അസമിൽ തിരഞ്ഞെടുപ്പ് കമ്മീഷൻ (ഇസിഐ) പുറപ്പെടുവിച്ച ഡീലിമിറ്റേഷൻ വിജ്ഞാപനത്തിന് അംഗീകാരം നൽകി. അസമിന്റെ ചരിത്രത്തിൽ സുപ്രധാനമായ ഒരു നാഴികക്കല്ല് കൈവരിച്ചിരിക്കുന്നു,” – ഹിമന്ത ബിശ്വ ശർമ്മ എക്‌സിൽ കുറിച്ചു.
കഴിഞ്ഞ വെള്ളിയാഴ്ചയാണ് അസമിലെ അതിർത്തി നിർണയത്തിന്റെ അന്തിമ ഉത്തരവ് തിരഞ്ഞെടുപ്പ് കമ്മീഷൻ പ്രസിദ്ധീകരിച്ചത് . ഡീലിമിറ്റേഷൻ പ്രകാരം മൂന്ന് അസംബ്ലി മണ്ഡലങ്ങൾ കൂടി പട്ടിക വർഗക്കാർക്കും (എസ്‌ടി) ഒരു മണ്ഡലം പട്ടികജാതിക്കാർക്കും (എസ്‌സി) സംവരണം ചെയ്തിട്ടുണ്ട്. അന്തിമ ഉത്തരവിൽ, കുറഞ്ഞത് 19 നിയമസഭാ മണ്ഡലങ്ങളുടെ നാമകരണവും കമ്മീഷൻ പരിഷ്കരിച്ചു. ഇസിഐ ആകെ അസംബ്ലി സീറ്റുകളുടെ എണ്ണം 126 ഉം ലോക്‌സഭാ സീറ്റുകൾ 14 ഉം നിലനിർത്തി.
2023 ജൂലൈയിലെ കരട് നിർദ്ദേശത്തിന്മേൽ ഗുവാഹത്തിയിൽ മൂന്ന് ദിവസത്തെ പബ്ലിക് ഹിയറിംഗും 2023 മാർച്ചിൽ റിപ്പോർട്ട് തയ്യാറാക്കുന്നതിന് മുമ്പുള്ള യോഗങ്ങളും ഉൾപ്പെടുന്ന വിവിധ പങ്കാളികളുമായി വിപുലമായ കൂടിയാലോചനയ്ക്ക് ശേഷമാണ് തിരഞ്ഞെടുപ്പ് ബോഡി അന്തിമ വിജ്ഞാപനം തയ്യാറാക്കിയത്.
അതേസമയം, സംസ്ഥാനത്തെ പ്രതിപക്ഷ സീറ്റുകൾ ലക്ഷ്യമിട്ടാണ് അതിർത്തി നിർണയമെന്ന് കോൺഗ്രസ് ആരോപിച്ചു.
“നിങ്ങൾ അസമിന്റെ അതിർത്തി നിർണയം നോക്കുകയാണെങ്കിൽ, അത് പ്രതിപക്ഷ സീറ്റുകളെയാണ് ലക്ഷ്യമിടുന്നത്. കാലിയബോർ, നാഗോൺ, ബാർപേട്ട എന്നിവിടങ്ങളിൽ കോൺഗ്രസ് പിടിച്ചടക്കിയ ലോക്‌സഭാ സീറ്റുകളാണ് ബിജെപിയുടെ ലക്ഷ്യം ,” – കോൺഗ്രസ് നേതാവും എംപിയുമായ ഗൗരവ് ഗൊഗോയ് പറഞ്ഞു.
ഡീലിമിറ്റേഷൻ ബദറുദ്ദീൻ അജ്മലിന്റെ നേതൃത്വത്തിലുള്ള ഓൾ ഇന്ത്യ യുണൈറ്റഡ് ഡെമോക്രാറ്റിക് ഫ്രണ്ടിന് (എഐയുഡിഎഫ്) ഗുണം ചെയ്തുവെന്നും ഇത് എഐയുഡിഎഫും ബിജെപിയും തമ്മിലുള്ള അവിശുദ്ധ ബന്ധം തുറന്നുകാട്ടുന്നുവെന്നും അദ്ദേഹം പറഞ്ഞു.
മോറിഗാവ് അസംബ്ലി നിയോജക മണ്ഡലം സംവരണം ചെയ്യാതിരിക്കുക, ലഹോവൽ, അംഗുരി നിയമസഭാ മണ്ഡലങ്ങൾ ശിവസാഗർ ജില്ലയിൽ തന്നെ നിലനിർത്തുക, ശിവസാഗറിന്റെ പ്രദേശങ്ങൾ തൊട്ടടുത്തായി ഉൾപ്പെടുത്തുക തുടങ്ങിയ ആവശ്യങ്ങൾ അംഗീകരിക്കാത്തതിനെച്ചൊല്ലിയുള്ള ഡീലിമിറ്റേഷൻ റിപ്പോർട്ടിന്റെ അന്തിമ കരട് രേഖയ്‌ക്കെതിരെ കഴിഞ്ഞയാഴ്ച സംസ്ഥാനം പ്രതിഷേധം നേരിട്ടു.
