സിപിഎം കോഴിക്കോട് ജില്ലാ സെക്രട്ടറിയേറ്റ് അംഗവും തിരുവമ്പാടി മുൻ എംഎൽഎയുമായ ജോർജ് തോമസിനെ സിപിഎം സസ്പെൻഡ് ചെയ്തു. ഒരു വർഷത്തേക്കാണ് സസ്പെൻഷൻ. കൂടാതെ പോഷക സംഘടനകൾ അടക്കമുള്ളവയുടെ ഭാരവാഹിത്വത്തിൽ നിന്നു നീക്കാനും സംസ്ഥാന സെക്രട്ടേറിയറ്റ് തീരുമാനിച്ചു. കോഴിക്കോട് ജില്ലാ കമ്മിറ്റിയിലെ ഒരു വിഭാഗം നൽകിയ ശുപാർശയെ തുടർന്നാണ് നടപടി.
സാമ്പത്തിക ക്രമക്കേടും പാർട്ടി അച്ചടക്കം ലംഘിച്ചുള്ള പ്രവർത്തനങ്ങളുമാണ് നടപടിക്ക് കാരണം. പരാതിയിൽ പറയുന്ന പാർട്ടിവിരുദ്ധ പ്രവർത്തനങ്ങൾ ജോർജ് എം.തോമസിന്റെ ഭാഗത്തു നിന്ന് ഉണ്ടായതായി അന്വേഷണ കമ്മിഷൻ കണ്ടെത്തി. ജില്ലാ നേതൃത്വത്തിനു നൽകിയ പരാതിയിൽ നടപടിയില്ലാത്തതിനെ തുടർ‌ന്നു സംസ്ഥാന നേതൃത്വത്തിനു നേരിട്ടു പരാതി നൽകുകയായിരുന്നു.
