മലേഷ്യ മാസ്‌റ്റേഴ്‌സ് ടൂർണമെന്റിൽ ഇന്ത്യൻ താരം എച്ച്എസ് പ്രണോയ് ഫൈനലിൽ. ശനിയാഴ്‌ച നടന്ന സെമിഫൈനൽ മത്സരത്തിൽ കാൽമുട്ടിനേറ്റ പരുക്കിനെത്തുടർന്ന് ഇന്തോനേഷ്യയുടെ ക്രിസ്റ്റ്യൻ അഡിനാറ്റ പിന്മാറിയതിനെ തുടർന്നാണ് പ്രണോയ് പുരുഷ സിംഗിൾസ് ഫൈനലിൽ പ്രവേശിച്ചത്.
ഇടത് കാൽമുട്ടിനേറ്റ പരിക്ക് മൂലം പുറത്തു പോകുമ്പോൾ അഡിനാറ്റ 19-17ന് ആദ്യ ഗെയിമിൽ ലീഡ് ചെയ്യുകയായിരുന്നു. ചൈനയുടെ വെങ് ഹോങ് യാങ്ങും ചൈനീസ് തായ്പേയിയുടെ ലിൻ ചുൻ-യിയും തമ്മിലുള്ള മറ്റൊരു സെമിഫൈനൽ മത്സരത്തിലെ വിജയിയെയാണ് പ്രണോയ് ഫൈനലിൽ നേരിടുക. കഴിഞ്ഞ വർഷം സ്വിസ് ഓപ്പണിൽ രണ്ടാം സ്ഥാനത്തെത്തിയതിന് ശേഷമുള്ള പ്രണോയിയുടെ സീസണിലെ ആദ്യ ഫൈനലാണിത്.
ഒളിമ്പിക്‌സ് മെഡൽ ജേതാവായ പിവി സിന്ധുവിന് ഫൈനലിൽ കടക്കാനായില്ല. ഇന്തോനേഷ്യയുടെ ഗ്രിഗോറിയ മാരിസ്‌ക ടുൻ‌ജംഗിനോട് 14-21,17-21 എന്ന സ്‌കോറിന് തോറ്റ സിന്ധു സെമിയിൽ പുറത്താവുകയായിരുന്നു.
