കേരള അഡ്മിനിസ്ട്രേറ്റീവ് സര്‍വീസിന്റെ ക്വാട്ട ഉയര്‍ത്താനൊരുങ്ങി സര്‍ക്കാര്‍. റിപ്പോര്‍ട്ടുകള്‍ പ്രകാരം, വിവിധ വകുപ്പുകളിലെ ക്വാട്ട 10 ശതമാനം കൂടി ഉയര്‍ത്തിയതിനുശേഷം 20 ശതമാനമാക്കി മാറ്റാനാണ് സര്‍ക്കാര്‍ പദ്ധതിയിടുന്നത്.
ഈ മാസം 30ന് മുഖ്യമന്ത്രിയുടെ അധ്യക്ഷതയില്‍ ചേരുന്ന യോഗത്തില്‍ ക്വാട്ട വര്‍ദ്ധിപ്പിക്കുന്നതുമായി ബന്ധപ്പെട്ട അന്തിമ തീരുമാനം എടുക്കുന്നതാണ്.
കെഎഎസ് വിഹിതം ഉയര്‍ത്തണമെങ്കില്‍ നിലവിലെ സ്പെഷ്യല്‍ റൂള്‍ ഭേദഗതി ചെയ്യേണ്ടതുണ്ട്. നിലവില്‍, സെക്രട്ടറിയേറ്റില്‍ ഉള്‍പ്പെടെ 30 വകുപ്പുകളിലായി 10 ശതമാനമാണ് കെഎഎസ് നിയമനം. ഈ വര്‍ഷം അവസാനത്തോടെ വിജ്ഞാനം പുറപ്പെടുവിച്ചതിനു ശേഷം അടുത്ത വര്‍ഷം പുതിയ നിയമനം നടത്തുന്ന തരത്തിലാണ് നടപടികള്‍ സ്വീകരിക്കുക. കെഎഎസില്‍ വിജ്ഞാപനം ചെയ്തിട്ടുള്ള വിവിധ വകുപ്പുകളില്‍ 120 ഓളം തസ്തികകളാണ് ഉള്ളത്. അതേസമയം, കെഎഎസ് ക്വാട്ട ഉയര്‍ത്തുന്നതുമായി ബന്ധപ്പെട്ട് നിരവധി പേര്‍ പ്രതിഷേധം അറിയിച്ചിട്ടുണ്ട്.
