ഗാസ> ഗാസയില്‍ വിവിധ പ്രദേശങ്ങളില്‍ ഇസ്രയേല്‍ നടത്തിയ വ്യോമാക്രമണങ്ങളില്‍ 15 പലസ്തീന്കാര് കൊല്ലപ്പെട്ടു.
മരിച്ചവരില്‍ ആറ് സ്ത്രീകളും നാല് കുട്ടികളുമുണ്ടെന്ന് പലസ്തീന്‍ ആരോഗ്യ മന്ത്രാലയം അറിയിച്ചു. പലസ്തീന്‍ വിമോചനത്തിനായി പ്രവര്‍ത്തിക്കുന്ന പലസ്തീന്‍ ഇസ്ലാമിക് ജിഹാദിന്റെ പ്രവര്‍ത്തകരെ ലക്ഷ്യമിട്ടായിരുന്നു ആക്രമണമെന്നാണ് ഇസ്രയേലിന്റെ വിശദീകരണം. സംഘടനയുടെ മുതിര്‍ന്ന മൂന്ന് നേതാക്കളും കൊല്ലപ്പെട്ടവരില്‍ ഉള്‍പ്പെടുന്നു.
ഗാസ, റാഫാ നഗരങ്ങളിലെ ജനവാസമേഖലയിലേക്കാണ് ഇസ്രയേല്‍ തുടര്‍ മിസൈല്‍ ആക്രമണം നടത്തിയത്. ഗാസയിലെ പാര്‍പ്പിട സമുച്ചയത്തിന്റെ നാലും അഞ്ചും ആറും നിലകള്‍ പൂര്‍ണമായും തകര്‍ന്നു. തിങ്കള്‍ വൈകിട്ട് തുടങ്ങിയ ആക്രമണം ചൊവ്വ പുലര്‍ച്ചെവരെ നീണ്ടു. 20 പേര്‍ക്ക് ആക്രമണത്തില്‍ പരിക്കേറ്റു. * അതിനിടെ, തെക്കന്‍ ഗാസയില്‍ ഇസ്രയേല്‍ നടത്തിയ ആക്രമണത്തില്‍ കാറില്‍ സഞ്ചരിക്കുകയായിരുന്ന രണ്ടുപേര്‍ കൊല്ലപ്പെട്ടു.ഈവര്‍ഷം ഇതുവരെ വെസ്റ്റ് ബാങ്കിലും കിഴക്കന്‍ ജറുസലേമിലും മാത്രം ഇസ്രയേല്‍ ആക്രമണത്തില്‍ 105 പലസ്തീന്‍കാരാണ് കൊല്ലപ്പെട്ടത്.
