ഒരു ഇന്ത്യൻ വംശജനായ ക്രിമിനൽ സംഘ തലവനെ ബ്രിട്ടീഷ് കോടതിയിൽ മയക്കുമരുന്ന് കള്ളക്കടത്ത്, കള്ളപ്പണം വെളുപ്പിക്കൽ എന്നീ കുറ്റങ്ങൾ സമ്മതിച്ചതോടെ എട്ട് വർഷവും 10 മാസവും തടവ് ശിക്ഷയ്ക്ക് വിധിച്ചു. തെക്ക്-കിഴക്കൻ ഇംഗ്ലണ്ടിലെ സറേയിൽ നിന്നുള്ള രാജ് സിംഗ് (45) ഒരു സംഘടിത ക്രൈം ഗ്രൂപ്പ് നടത്തിയിരുന്നതായും വഖാസ് ഇഖ്ബാലുമായി (41) ചേർന്ന് എ ക്ലാസ് മയക്കുമരുന്നുകളും തോക്കുകളും വാങ്ങാനും വിൽക്കാനും പതിവായി പ്രവർത്തിച്ചിരുന്നതായി തങ്ങളുടെ ഉദ്യോഗസ്ഥർ തെളിയിച്ചതായി യുകെയുടെ നാഷണൽ ക്രൈം ഏജൻസി (എൻസിഎ) പറഞ്ഞു.
കള്ളപ്പണം പണം വെളുപ്പിക്കാനും കെറ്റാമൈൻ കാനഡയിലേക്ക് അയയ്ക്കാനും ഇരുവരും പദ്ധതിയിട്ടിരുന്നു. ഫെബ്രുവരിയിൽ, സിംഗ് (മുഴുവൻ പേര് രജീന്ദർ സിംഗ് ബസ്സി) എ ക്ലാസ് നിരോധിത ലഹരിവസ്‌തുവായ കൊക്കെയ്ൻ വിതരണം, ബി ക്ലാസ് നിരോധിത ലഹരിവസ്‌തുവായ കെറ്റാമൈൻ വിതരണം ചെയ്യാനുള്ള ഗൂഢാലോചന എന്നിവയും കള്ളപ്പണം വെളുപ്പിക്കൽ കുറ്റവും ഗിൽഡ്ഫോർഡ് ക്രൗൺ കോടതിയിൽ സമ്മതിച്ചിരുന്നു.
ഒരു പബിലുണ്ടായ സംഘർഷത്തിന് ഇടയിൽ, തടയാൻ ശ്രമിച്ച ഒരു പോലീസ് ഉദ്യോഗസ്ഥയ്ക്ക് എതിരെ ആക്രമണം നടത്തിയതായും ഇയാൾ സമ്മതിച്ചു. കാൽമുട്ടിലേറ്റ പരിക്കുകൾ കാരണം ഫ്രണ്ട്‌ലൈൻ സർവീസിലേക്ക് മടങ്ങാൻ കഴിയാത്ത ഉദ്യോഗസ്ഥയ്ക്ക് നേരെയുള്ള ആക്രമണത്തിന്റെ പേരിൽ ലഭിച്ച 16 മാസത്തെ തടവും ആകെ ശിക്ഷയിൽ ഉൾപ്പെടുന്നു.
എ ക്ലാസ് മയക്കുമരുന്ന് ഇറക്കുമതി ചെയ്യാനുള്ള ഗൂഢാലോചന, നിരോധിത ആയുധം കൈമാറാനുള്ള ഗൂഢാലോചന, കള്ളപ്പണം വെളുപ്പിക്കൽ എന്നിവ സമ്മതിച്ചതിനെ തുടർന്ന് വെള്ളിയാഴ്‌ച തെക്കൻ ഇംഗ്ലണ്ടിലെ അതേ കോടതിയിൽ ഇഖ്ബാലിനെ 12 വർഷം തടവിന് ശിക്ഷിച്ചതിന് ശേഷമാണ് കേസിന്റെ വിശദാംശങ്ങൾ എൻസിഎ വെളിപ്പെടുത്തിയത്.
“ഇക്ബാലും സിംഗും ലണ്ടൻ പ്രദേശത്തായിരുന്നു പ്രവർത്തിച്ചിരുന്നതെങ്കിലും, യൂറോപ്പിലെയും കൂടുതൽ വിദേശരാജ്യങ്ങളിലെയും ഒന്നിലധികം രാജ്യങ്ങളിൽ അവർക്ക് ക്രിമിനൽ ബന്ധങ്ങളുണ്ടായിരുന്നു,” എൻസിഎ ഓപ്പറേഷൻസ് മാനേജർ ഡീൻ വാൾബാങ്ക് പറഞ്ഞു.
“മറ്റ് ഉയർന്ന തലത്തിലുള്ള ഡീലർമാരെപ്പോലെ, ഇഖ്ബാലും സിംഗും സമൂഹത്തിന് വളരെ ഗുരുതരമായ ദ്രോഹത്തിന് ഉത്തരവാദികളാണ്. തോക്കുകളും മയക്കുമരുന്നുകളും എന്ത് രക്തച്ചൊരിച്ചിലിലേക്ക് നയിച്ചുവെന്ന് അവർ കാര്യമാക്കിയില്ല, പണം സമ്പാദിച്ചിക്കുക മാത്രമായിരുന്നു ലക്ഷ്യം. എ ക്ലാസ് മയക്കുമരുന്നുകളുടെയും ആയുധങ്ങളുടെയും ഭീഷണികളിൽ നിന്ന് പൊതുജനങ്ങളെ സംരക്ഷിക്കുന്നത് എൻസിഎയുടെ മുൻഗണനയാണ്”അദ്ദേഹം പറഞ്ഞു.
എൻക്രിപ്റ്റഡ് കമ്മ്യൂണിക്കേഷൻ പ്ലാറ്റ്‌ഫോമായ എൻക്രോചാറ്റിൽ ക്ലാസ് എ മരുന്നുകളും തോക്കുകളും വാങ്ങാനും വിതരണം ചെയ്യാനുമുള്ള സന്ദേശങ്ങൾ കണ്ടെത്തിയതിനെ തുടർന്നാണ് എൻസിഎ ഇരുവരെയും പിടികൂടിയത്.
എൻക്രോചാറ്റിൽ അവരുടെ യഥാർത്ഥ പേരുകളിലല്ല അവർ അറിയപ്പെട്ടിരുന്നത്, “ഹാൻഡിലുകൾ” എന്ന പേരിലാണ് അവർ അറിയപ്പെട്ടിരുന്നത് (സിംഗ് സാൽമോണജെന്റായും ഇഖ്ബാൽ ഗോസ്റ്റ്ഷൂട്ടറായും). നിർണായകമായ ഫോൺ തെളിവുകളിൽ നിന്ന് ഇരുവരും ഗൂഢാലോചന നടത്തിയതായി കണ്ടെത്തുകയായിരുന്നു.
