പാലക്കാട്: കാഞ്ഞിരത്താണിയില്‍ വീടിന് നേരെ പെട്രോള്‍ ബോംബേറ്. കാഞ്ഞിരത്താണി സ്വദേശി ഫൈസലിന്റെ വീടിന്റെ ഒരുഭാഗവും ,വാഹനങ്ങളും ബോംബേറില്‍ കത്തി നശിച്ചു.
പുക ശ്വസിച്ചതിനെ തുടര്‍ന്നുണ്ടായ ആരോഗ്യ പ്രശ്നം കാരണം നാലുപേരെ ആശുപത്രിയില്‍ പ്രവേശിപ്പിച്ചു..
വ്യാഴാഴ്ച അര്‍ധരാത്രിയാണ് ഫൈസലിന്റെ വീടിന് അജ്ഞാത സംഘം തീയിട്ടത്. വീടിന് മുന്നില്‍ ഇരുചക്രവാഹനം, കാര്‍ ,ടിപ്പര്‍ ലോറി തുടങ്ങിയവ ഉണ്ടായിരുന്നു. ഇതില്‍ കാര്‍ പൂര്‍ണ്ണമായും കത്തി നശിച്ചു. വീടിന്റെ മുന്‍ഭാഗവും കത്തി നശിച്ചു. ഫൈസല്‍ ഇന്നലെ വീട്ടിലുണ്ടായിരുന്നില്ല.
ബന്ധുക്കളും , അയല്‍വാസികളും ഓടി എത്തിയായിരുന്നു തീയണച്ചത്. പുക ശ്വാസിച്ചതിനെ തുടര്‍ന്ന് ഫൈസലിന്റെ ഭാര്യ റഹ്മത്ത് , എട്ടും, നാലും വയസുള്ള മക്കള്‍ , റഹ്മത്തിന്റെ സഹോദര പുത്രന്‍ റമീസ് തുടങ്ങിയവരെ ആശുപത്രിയില്‍ പ്രവേശിപ്പിച്ചു. തൃത്താല പൊലീസ് കേസ് എടുത്ത് അന്വേഷണം ആരംഭിച്ചു.
