ആരൊക്കൊയിയിരിക്കും ബിഗ് ബോസിൽ വീട്ടിലുണ്ടാവുക എന്നറിയാനുള്ള കാത്തിരിപ്പിലാണ് ആരാധകർ. ഇപ്പോഴിതാ ഈ സീസണിലെ ചില കാര്യങ്ങൾ തുറന്ന് പറഞ്ഞ് എത്തിയിരിക്കുകയാണ് മോഹൻലാൽ. ഏഷ്യാനെറ്റിൻറെ ഫേസ്ബുക്ക് ലൈവിൽ പ്രതികരിക്കുകയായിരുന്നു മോഹൻലാൽ. ഇത്തവണത്തെ സീസൺ ബാറ്റിൽ ഓഫ് ഒറിജിൻ എന്നാണ് അറിയപ്പെടുന്നത്.
കൃത്യമായ നിയമ പുസ്തകത്തിൻറെ അടിസ്ഥാനത്തിലാണ് ബിഗ് ബോസ് പ്രവർത്തിക്കുന്നതെന്ന് മോഹൻലാൽ പറഞ്ഞു. ചില ആളുകൾ അത് അനുസരിക്കാതിരിക്കുമ്പോൾ അതിൽ ഇടപെടും. അതിനാൽ ഇപ്പോഴെ അവർക്ക് പ്രത്യേക നിർദേശം കൊടുക്കാൻ കഴിയില്ല. പുതിയൊരു പ്ലാറ്റ്‌ഫോം എന്ന നിലയിൽ ഇത്രയും സീസണുകളിൽ ബിഗ്‌ബോസ് അവതാരകൻ എന്ന റോൾ ആസ്വദിച്ചു. എന്നാൽ അത് ഒരു വെല്ലുവിളിയല്ലെന്നും മോഹൻലാൽ കൂട്ടിച്ചേർത്തു.
‘ഞാൻ എല്ലാ സീസണിലും ഒറിജിനൽ ആയിട്ട് തന്നെയാണ് നിൽക്കുന്നത്. കാരണം ഈ ഷോയിൽ നമുക്ക് കള്ളത്തരങ്ങൾ ഒന്നും കാണിക്കാൻ പറ്റില്ല. ഒരാളുടെ മനസിൽ സംഭവിക്കാൻ പോകുന്ന കാര്യങ്ങളെ നേരത്തെ സ്‌ക്രിപ്റ്റ് ചെയ്യാൻ നമുക്ക് പറ്റില്ലല്ലോ. അതൊന്നും ലോകത്താർക്കും സ്‌ക്രിപ്റ്റ് ചെയ്യാൻ പറ്റില്ല. അത്തരം കാര്യങ്ങളിൽ ഏറ്റവും ഒറിജിനൽ ആയി പ്രവർത്തിക്കാൻ തന്നെയാണ് എനിക്ക് താല്പര്യം. അങ്ങനെ തന്നെയാണ് ഞാൻ ചെയ്തിട്ടുള്ളത്. ഒരാളെ സപ്പോർട്ട് ചെയ്യക, അയാൾക്ക് വേണ്ടി നിൽക്കുകയൊന്നും ഞാൻ ചെയ്തിട്ടില്ല. അങ്ങനെ ചെയ്യാൻ പറയുന്ന ദിവസം ഞാൻ ഇവിടുന്ന് ഇറങ്ങി പോകുകയും ചെയ്യും. അങ്ങനെ എന്തായാലും ഒരിക്കലും പറയേണ്ടി വരില്ല’, എന്നും മോഹൻലാൽ പറഞ്ഞത്.
ബിഗ്‌ബോസ് ഷോ സ്‌ക്രിപ്റ്റഡ് ആണോ എന്ന ചോദ്യത്തിന് പ്രസക്തിയില്ലെന്നും മോഹൻലാൽ പറഞ്ഞു. ‘ഇത്തരം ഒരു ഷോ സ്‌ക്രിപ്റ്റഡായി ചെയ്യാൻ സാധിക്കില്ല. ഇതുവരെ ഈ ഷോ കഴിഞ്ഞ് ഇറങ്ങിയവർ ഉണ്ട്, അവരോട് ചോദിച്ചാലും ഇത് തന്നെയാണ് പറയുക. ജീവിതം പോലെയാണ് ഈ ഷോയും എന്ത് സംഭവിക്കും എന്ന് പറയാൻ പറ്റില്ല. ജീവിതത്തിൽ സ്‌ക്രിപ്റ്റ് ചെയ്യാൻ സാധിക്കില്ല. അതുപോലെ തന്നെയാണ് ഈ ഷോയിലും ‘ മോഹൻലാൽ പറഞ്ഞു.
