മോസ്‌കോ: സോവിയറ്റ് യൂണിയന്റെ അവസാന നേതാവ് മിഖായേല്‍ ഗോര്‍ബച്ചേവ് അന്തരിച്ചു. സോവിയറ്റ് യൂണിയന്റെ അവസാന പ്രസിഡന്റ് കൂടിയായിരുന്നു അദ്ദേഹം. ശീതയുദ്ധം കൊടുമ്പിരി കൊണ്ടിരിക്കുന്ന സമയത്താണ് ഗോര്‍ബച്ചേവ് അധികാരത്തിലെത്തുന്നത്. നിരവധി സാമ്പത്തിക പരിഷ്‌കാരങ്ങളാണ് ഇക്കാലയളവില്‍ അദ്ദേഹം കൊണ്ടുവന്നത്.
ശീതയുദ്ധം അവസാനിപ്പിക്കുന്നതില്‍ നിര്‍ണായക പങ്കുവഹിച്ചത് ഗോര്‍ബച്ചേവിന്റെ പരിഷ്‌കാരങ്ങളായിരുന്നു. അദ്ദേഹത്തിന് 91 വയസ്സായിരുന്നു. മോസ്‌കോയില്‍ വെച്ചായിരുന്നു അന്ത്യം. 20ാം നൂറ്റാണ്ടിലെ മഹാനായ നേതാക്കളുടെ പട്ടികയിലാണ് ഗോര്‍ബച്ചേവിന്റെയും സ്ഥാനം.
റഷ്യന്‍ വാര്‍ത്താ ഏജന്‍സികളാണ് ഗോര്‍ബച്ചേവിന്റെ മരണം സ്ഥിരീകരിച്ചത്. മോസ്‌കോയിലെ സെന്‍ട്രല്‍ ആശുപത്രിയില്‍ വെച്ചായിരുന്നു മരണം. വാര്‍ധക്യ സഹജമായ അസുഖത്തെ തുടര്‍ന്ന് അദ്ദേഹം കിടപ്പിലായിരുന്നു. 1985നും 1991നും ഇടയിലാണ് ഗോര്‍ബച്ചേവ് അധികാരത്തില്‍ ഇരുന്നത്.
