പൃഥ്വിരാജ്, ഇന്ദ്രജിത്ത്, വിജയ് ബാബു എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ‘തീർപ്പി’ന്റെ ട്രെയിലർ എത്തി. ആദ്യാവസാനം സസ്പെന്‍സ് നിറഞ്ഞിരിക്കുന്ന രംഗങ്ങളാണ് ട്രെയിലറില്‍ കാണാന്‍ കഴിയുന്നത്. ‘വിധിതീർപ്പിലും പകതീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക്: തീർപ്പ്’…എന്നതാണ് ചിത്രത്തിന്റെ ടാഗ്‍ലൈൻ. സൈജു കുറുപ്പ്, സിദ്ദിഖ്, ലുക്മാന്‍, ഇഷ തൽവാർ, ഹന്ന റെജി കോശി എന്നിവരാണ് ട്രെയിലറിൽ പ്രത്യക്ഷപ്പെടുന്ന മറ്റ് താരങ്ങള്‍.
വലിയ ക്യാൻവാസിൽ ഒരുക്കിയ കമ്മാരസംഭവത്തിനു ശേഷം രതീഷ് അമ്പാട്ട് – മുരളി ഗോപി കൂട്ടുകെട്ട് വീണ്ടും ഒത്തുചേരുന്ന ചിത്രം കൂടിയാണിത്. വൻ വിജയം നേടിയ ലൂസിഫറിനു ശേഷം മുരളി ഗോപിയുടെ തിരക്കഥയിൽ ഒരുങ്ങുന്ന ചിത്രമെന്ന നിലയിലും പ്രത്യേകതയുണ്ട്.ഫ്രൈഡേ ഫിലിം ഹൗസ്, സെല്ലുലോയ്ഡ് മാർഗ് എന്നിവയുടെ ബാനറിൽ വിജയ് ബാബു, രതീഷ് അമ്പാട്ട്, മുരളി ഗോപി എന്നിവർ ചേർന്നാണ് തീർപ്പ് നിർമിച്ചിരിക്കുന്നത്.ഹോം സിനിമയ്ക്കു ശേഷം ഫ്രൈഡേയുടെ ബാനറിൽ റിലീസിനൊരുങ്ങുന്ന ചിത്രം കൂടിയാണിത്. സുനിൽ കെ.എസ് ആണ് ഛായാഗ്രഹണം. മുരളി ഗോപിയാണ് ഗാനരചനയും സംഗീതസംവിധാനവും. ഗോപി സുന്ദറാണ് പശ്ചാത്തലസംഗീതം. ദീപു ജോസഫാണ് എഡിറ്റിങ്.
കോവിഡ് പ്രോട്ടോക്കോളുകള്‍ക്കിടയില്‍ 48 ദിവസം കൊണ്ടാണ് സിനിമയുടെ ചിത്രീകരണം അണിയറ പ്രവർത്തകർ പൂർത്തിയാക്കിയത്. സിനിമയുടെ റിലീസ് തിയതി വരും ദിവസങ്ങളിൽ പ്രഖ്യാപിക്കുമെന്നാണ് സൂചന.
