വധഗൂഢാലോചനാക്കേസില്‍ ദിലീപിന്റെ അഭിഭാഷകര്‍ക്ക് ക്രൈംബ്രാഞ്ച്(crime branch) നോട്ടീസ്. രാമന്‍പിളള അസോസിയേറ്റ്‌സിനാണ് നോട്ടീസ് നല്‍കിയത്. സൈബര്‍ ഹാക്കര്‍ സായി ശങ്കറിന്റെ പക്കല്‍ നിന്ന് വാങ്ങിവെച്ച ഡിജിറ്റല്‍ ഗാഡ്ജറ്റുകള്‍ അടക്കമുളളവ ഉടന്‍ ഹാജരാക്കണമെന്നാണ് നോട്ടീസില്‍ ആവശ്യപ്പെട്ടിരിക്കുന്നത്. ലാപ്ടോപ്പ് അടക്കം അഞ്ച് വസ്തുക്കള്‍ ദിലീപിന്റെ അഭിഭാഷകര്‍ തന്റെ കയ്യില്‍ നിന്നും വാങ്ങി വച്ചതായി സായ് ശങ്കര്‍ മൊഴി നല്‍കിയിരുന്നു. ഇത് അടിയന്തിരമായി ഹാജരാക്കാനാണ് നിര്‍ദ്ദേശം നല്‍കിയിരിക്കുന്നത്.
അഡ്വ.ഫിലിപ്പ്.ടി.വര്‍ഗീസ്, അഡ്വ.സുജേഷ് മേനോന്‍ എന്നിവര്‍ക്കും നോട്ടീസ് നല്‍കിയിട്ടുണ്ട്. ദിലീപിന്റെ ഫോണിലെ പ്രധാന തെളിവുകള്‍ നശിപ്പിക്കാന്‍ ഇവര്‍ കൂട്ടുനിന്നുവെന്നാണ് ആരോപണം. അഭിഭാഷകരുടെ നിര്‍ദ്ദേശപ്രകാരമാണ് ദിലീപിന്റെ ഫോണിലെ ചിത്രങ്ങളും രേഖകളും മായ്ച്ചതെന്ന് സായ് ശങ്കര്‍ മൊഴി നല്‍കിയിട്ടുണ്ട്. തെളിവ് നശിപ്പിച്ചെന്ന ആരോപണത്തില്‍ ദിലീപിന്റെ മൂന്ന് അഭിഭാഷകര്‍ക്ക് കേരള ബാര്‍ കൗണ്‍സിലും നോട്ടീസ് നല്‍കിയിട്ടുണ്ട്.
