ടെല്‍അവീവ്: ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹു കോവിഡ് വാക്സിന്‍ സ്വീകരിച്ചു. ശനിയാഴ്ച വാക്സിന്‍ സ്വീകരിച്ചതോടെ കോവിഡ് വാക്സിന്‍ സ്വീകരിക്കുന്ന ആദ്യ ഇസ്രയേല്‍ പൗരനായി അദ്ദേഹം.
ശനിയാഴ്ച മുതല്‍ ഇസ്രയേലില്‍ ആരോഗ്യപ്രവര്‍ത്തകര്‍ക്കും നഴ്സിങ് ഹോം ജീവനക്കാര്‍ക്കും വാക്സിനേഷന്‍ ആരംഭിക്കും. ജനങ്ങള്‍ക്ക് മാതൃക സൃഷ്ടിക്കുന്നതിനായാണ് രാജ്യത്ത് ആദ്യ കോവിഡ് വാക്സിന്‍ സ്വീകരിക്കാന്‍ തയാറാകുന്നതെന്ന് നെതന്യാഹു അറിയിച്ചിരുന്നു.
‘ഞാന്‍ ഈ വാക്സിനെ വിശ്വസിക്കുന്നു’ -ടെല്‍ അവീവിലെ ശേബ മെഡിക്കല്‍ സെന്‍ററില്‍ ഫൈസര്‍ വാക്സിന്‍ സ്വീകരിച്ചശേഷം അദ്ദേഹം പറഞ്ഞു.കഴിഞ്ഞ ആഴ്ചയാണ് ഫൈസര്‍ വാക്സിന്‍ രാജ്യത്തെത്തിച്ചത്. മോഡേണ, ആസ്ട്ര സെനക വാക്സിനുകളും ഇസ്രയേല്‍ ഓര്‍ഡര്‍ ചെയ്തിട്ടുണ്ട്. ഈ വര്‍ഷം അവസാനത്തോടെ കോവിഡ് റിസ്ക് കൂടിയ 20ശതമാനത്തോളം പേരില്‍ വാക്സിനേഷന്‍ നടത്താനാണ് ഇസ്രയേലിന്‍റെ തീരുമാനം.
