തിരുവനന്തപുരം: സംസ്ഥാനത്ത് കൊറോണ നിയന്ത്രണങ്ങള്‍ക്ക് കൂടുതല്‍ ഇളവുകള്‍. സാങ്കേതിക വിദ്യാഭ്യാസ സ്ഥാപനങ്ങള്‍, സ്‌കൂളുകള്‍ ഒഴികെയുള്ള തൊഴിലധിഷ്ഠിത പരിശീലന കേന്ദ്രങ്ങള്‍ എന്നിവയ്ക്ക് പ്രവര്‍ത്തിക്കാന്‍ അനുമതി നല്‍കിയതായി സംസ്ഥാന ദുരന്ത നിവാരണ അതോറിറ്റി പുറത്തിറക്കിയ ഉത്തരവില്‍ പറയുന്നു.
പരിശീലന കേന്ദ്രങ്ങള്‍, നൃത്ത വിദ്യാലയങ്ങള്‍, ട്യൂഷന്‍ സെന്ററുകള്‍, കംപ്യൂട്ടര്‍ പരിശീലന സ്ഥാപനങ്ങള്‍ എന്നിവയ്ക്ക് ഇളവുകള്‍ ബാധകമാണ്. ഒരേ സമയം പഠനം നടക്കുന്ന ഹാളുകളില്‍ 50 ശതമാനം വിദ്യാര്‍ത്ഥികളോ അല്ലെങ്കില്‍ പരമാവധി 100 പേരെയോ മാത്രമേ ഉള്‍ക്കൊള്ളിക്കാന്‍ അനുമതിയുള്ളൂ.
ശാരീരിക അകലം, മാസ്‌ക്, സാനിറ്റൈസര്‍ തുടങ്ങിയ കൊറോണ മാനദണ്ഡങ്ങള്‍ പാലിക്കണമെന്നും പുതുക്കിയ ഉത്തരവില്‍ പറയുന്നു.പരിശീലന കേന്ദ്രങ്ങള്‍ തുറന്നു പ്രവര്‍ത്തിക്കാന്‍ അനുമതി നല്‍കണമെന്ന സ്ഥാപന ഉടമകളുടെ ആവശ്യം പരിഗണിച്ചാണ് ദുരന്ത നിവാരണ അതോറിറ്റിയുടെ ഉത്തരവ്.
മറ്റ് സംസ്ഥാനങ്ങളില്‍ നിന്ന് കേരളത്തിലെത്തുന്നവര്‍ക്കുള്ള ക്വാറന്റൈന്‍ ഒഴിവാക്കിയേക്കും. മറ്റു പല സംസ്ഥാനങ്ങളും സംസ്ഥാനാന്തര യാത്രക്ക് നിയന്ത്രണം ഒഴിവാക്കിയെങ്കിലും കേരളം 7 ദിവസക്ക് ക്വാറന്റൈനും രോഗപരിശോധനയും നിര്‍ബന്ധമായും തുടരുകയായിരുന്നു.
