മോണ്ടെവിഡിയോ: ലോകകപ്പ് യോഗ്യത റൗണ്ട് പോരാട്ടങ്ങളില്‍ കരുത്തരായ ബ്രസീലിനും അര്‍ജന്‍റീനക്കും ജയം. ബുധനാഴ്ച പുലര്‍ച്ചെ നടന്ന മത്സരത്തില്‍ ബ്രസീല്‍ യുറുഗ്വായ്യെയും അര്‍ജന്‍റീനയും പെറുവിനെയും തോല്‍പ്പിച്ചു. 2-0ത്തിനായിരുന്നു രണ്ട് വമ്ബന്മാരുടെയും വിജയം.
ഇതോടെ നാല് മത്സരങ്ങളില്‍ നാലും ജയിച്ച ബ്രസീല്‍ (12 പോയന്‍റ്) പോയന്‍റ് പട്ടികയില്‍ ഒന്നാം സ്ഥാനം അരക്കിട്ടുറപ്പിച്ചു. 10 പോയന്‍റുമായി അര്‍ജന്‍റീന രണ്ടാം സ്ഥാനത്താണ് .ഇനി നാല് മാസത്തിന് ശേഷം മാര്‍ച്ച്‌ 25 നാണ് ബ്രസീലിന് യോഗ്യത മത്സരം ഉള്ളത്.
ആര്‍തറും റിച്ചാര്‍ലിസണുമാണ് ബ്രസീലിനായി വലചലിപ്പിച്ചത്. ഇരു ടീമുകളിലും രണ്ട് സൂപ്പര്‍താരങ്ങളുടെ അഭാവമുണ്ടായിരുന്നു. പരിക്കേറ്റ സൂപ്പര്‍താരം നെയ്മറില്ലാതെ ബ്രസീലും കോവിഡ് ബാധിതനായ ലൂയി സുവാരസില്ലാതെ യുറുഗ്വായ്യും കളത്തിലിറങ്ങിയത്.
ആദ്യ പകുതിയിലായിരുന്നു ഇരുഗോളുകളും. രണ്ടാം പകുതിയില്‍ സൂപ്പര്‍ താരം എഡിന്‍സണ്‍ കവാനി ചുവപ്പ് കാര്‍ഡ് കണ്ട് പുറത്തായതും യുറുഗ്വായ്ക്ക് നിരാശയായി. രണ്ടാം പകുതിയില്‍ ഗോളുകളുടെ എണ്ണം വര്‍ധിപ്പിക്കാന്‍ സാധിച്ചില്ലെങ്കിലും എതിരാളികളെ പിടിച്ചുകെട്ടാന്‍ ബ്രസീലിനായി.
നികോളസ് ഗോണ്‍സാലസും ലോതറോ മാര്‍ടിനസും നേടിയ ഗോളുകളുടെ മികവിലാണ് അര്‍ജന്‍റീന 2-0ത്തിന് പെറുവിനെ തോല്‍പിച്ചത്. 2004ന് ശേഷം അര്‍ജന്‍റീന ആദ്യമായാണ് പെറുവില്‍ വിജയിക്കുന്നത്. നാല് മത്സരങ്ങളില്‍ നിന്ന് മൂന്ന് ജയവും ഒരു സമനിലയുമായി ബ്രസീലിന് പിന്നില്‍ രണ്ടാം സ്ഥാനത്താണ് അര്‍ജന്‍റീന. അവസാനം കളിച്ച മൂന്ന് മത്സരങ്ങളില്‍ മെസ്സിക്ക് സ്കോര്‍ ചെയ്യാനായില്ല.
