ബെയ്ജിങ്: ഇന്ത്യ, ബ്രിട്ടന്‍, ബെല്‍ജിയം, ഫിലിപ്പീന്‍സ് എന്നീ രാജ്യങ്ങളില്‍ നിന്നുള്ള യാത്രക്കാര്‍ക്ക് താല്‍ക്കാലികമായി യാത്ര വിലക്കേര്‍പ്പെടുത്തി ചൈന. വിദേശത്ത് നിന്ന് വരുന്ന യാത്രക്കാരില്‍ നിന്ന് കോവിഡ് സ്ഥിരീകരിക്കുന്നത് കൂടുന്നതിനെത്തുടര്‍ന്നാണ് നടപടി.
വന്ദേഭാരത് മിഷന്‍ ഭാഗമായി എയര്‍ ഇന്ത്യ വിമാനങ്ങള്‍ യാത്രക്കാരുമായി മടങ്ങാനിരിക്കെയാണ് ചൈനയുടെ അപ്രതീക്ഷിത നീക്കം. പുതിയ സാഹചര്യത്തില്‍ സര്‍വിസ് പുന:ക്രമീകരിക്കാനാണ് ഇന്ത്യയുടെ തീരുമാനമെന്ന് ബെയ്ജിങ്ങിലെ ഇന്ത്യന്‍ എംബസി അറിയിച്ചു. നവംബര്‍ 13, 20, 27 ഡിസംബര്‍ നാല് ദിവസങ്ങളിലായിരിക്കും പുതിയ വിമാനങ്ങള്‍.
ഒക്ടോബര്‍ 30ന് ചൈനയിലെത്തിയ എയര്‍ ഇന്ത്യ വിമാനത്തിലെ 23 യാത്രക്കാര്‍ക്ക് രോഗബാധ സ്ഥിരീകരിച്ചിരുന്നു.ഇതില്‍ 19 ഓളം യാത്രക്കാര്‍ യാതൊരു ലക്ഷണവും കാണിച്ചിരുന്നില്ല. കോവിഡ് നെഗറ്റീവ് സര്‍ട്ടിഫിക്കറ്റുമായെത്തിയവര്‍ക്കാണ് യാത്ര ചെയ്യാന്‍ സൗകര്യമൊരുക്കിയതെന്ന് എയര്‍ ഇന്ത്യയും പ്രതികരിച്ചിരുന്നു.
‘അത്യാവശ്യ കാര്യങ്ങള്‍ക്കും മാനുഷികമായ കാരണങ്ങള്‍ കൊണ്ടും യാത്ര ഒഴിവാക്കാന്‍ സാധിക്കാത്തവര്‍ക്ക് ചൈനീസ് എംബസി വഴിയോ ഇന്ത്യന്‍ കോണ്‍സുലേറ്റ് വഴിയോ വിസക്ക് അപേക്ഷിക്കാം. നവംബര്‍ മൂന്നിന് ശേഷം അനുവദിച്ച ചെയ്ത വിസകളുമായി ചൈനയിലേക്ക് പ്രവേശിക്കുന്നതില്‍ വിലക്കില്ല’ -ചൈനീസ് എംബസിയുടെ വെബ്സൈറ്റില്‍ പ്രസിദ്ധീകരിച്ച കുറിപ്പില്‍ പറഞ്ഞു.
ചൈനയുടെ തീരുമാനം താല്‍ക്കാലികമാണെന്നും ഇന്ത്യയില്‍ നിന്ന് ചൈനയിലേക്കും തിരിച്ചുമുള്ള ആവശ്യ സര്‍വിസുകള്‍ പെട്ടെന്നുതന്നെ സാധ്യമാക്കാനുള്ള ചര്‍ച്ചകള്‍ നടത്തിവരികയാണെന്നും അധികൃതര്‍ അറിയിച്ചു.
