കൊച്ചി: കള്ളപ്പണ ഇടപാട് ആരോപണത്തില്‍ പി.ടി.തോമസ് എംഎല്‍എയ്ക്കെതിരേ വിജിലന്‍സ് അന്വേഷണം നടത്തും. പ്രാഥമിക അന്വേഷണത്തിനാണ് വിജിലന്‍സ് വകുപ്പിന്റെ ഉത്തരവിറങ്ങിയിരിക്കുന്നത്. ഇടപ്പള്ളി ഭൂമി വിഷയത്തിലെ വിവാദമായ കള്ളപ്പണ ഇടപാട് സംബന്ധിച്ചാണ് അന്വേഷണം. പി.ടി തോമസിന്റെ സാന്നിധ്യത്തിലാണ് കള്ളപ്പണം നല്‍കിയതെന്നതാണ് ആരോപണം.
ഇക്കാര്യത്തില്‍ പി.ടി തോമസിന്റെ ഇടപാടുകള്‍ അന്വേഷിക്കണമെന്ന് ആവശ്യപ്പെട്ട് സര്‍ക്കാരിന് ലഭിച്ച പരാതികള്‍ പരിഗണിച്ചാണ് അന്വേഷണത്തിന് ഉത്തരവിറങ്ങിയിരിക്കുന്നത്. എം.എല്‍.എയ്‌ക്കെതിരെ പ്രാഥമിക അന്വേഷണത്തിന് സ്പീക്കറും അനുമതി നല്‍കിയിരുന്നു. പി.ടി.തോമസിനെതിരേ എറണാകുളം വിജിലന്‍സില്‍ ലഭിച്ച പരാതി വിജിലന്‍സ് ആസ്ഥാനത്തേക്ക് കൈമാറുകയായിരുന്നു.പിന്നാലെ അന്വേഷണം ശിപാര്‍ശ ചെയ്ത് ഡിജിപി ആഭ്യന്തരവകുപ്പിനെ സമീപിച്ചു. പരാതി പരിശോധിച്ച്‌ പ്രാഥമിക അന്വേഷണം നടത്താന്‍ അഡീഷണല്‍ ചീഫ് സെക്രട്ടറി നിര്‍ദ്ദേശം നല്‍കിയതോടെയാണ് പുതിയ നീക്കം.
