ഇന്നത്തെ തിരക്കേറിയ ജീവിതത്തിനിടയിൽ ഉറക്കമില്ലായ്മയും ദഹനപ്രശ്നങ്ങളും അമിത സമ്മർദവും അലട്ടാത്തവർ ചുരുക്കമാണ്. എന്നാൽ ഈ പ്രശ്നങ്ങൾക്കെല്ലാം നിങ്ങളുടെ അടുക്കളയിൽത്തന്നെ വളരെ ലളിതമായ ഒരു പരിഹാരമുണ്ടെന്ന് പറയുകയാണ് ഗാസ്ട്രോഎൻട്രോളജിസ്റ്റായ ഡോ.സൗരഭ് സേഥി.
വലിപ്പത്തിൽ ചെറുതാണെങ്കിലും പോഷകങ്ങളുടെ കാര്യത്തിൽ ഒരു ‘അത്ഭുത വിത്ത്’ തന്നെയാണ് മത്തങ്ങ വിത്തുകളെന്ന് അദ്ദേഹം പറഞ്ഞു. ശരീരത്തിന് ആവശ്യമായ മഗ്നീഷ്യം, സിങ്ക്, നാരുകൾ, ഹെൽത്തി ഫാറ്റുകൾ എന്നിവയാൽ സമ്പന്നമാണ് ഇവ. ദിവസവും ഒരു പിടി മത്തങ്ങ വിത്തുകൾ ഭക്ഷണക്രമത്തിൽ ഉൾപ്പെടുത്താൻ അദ്ദേഹം നിർദേശിച്ചു.
1. സുഖകരമായ ഉറക്കത്തിന്
രാത്രിയിൽ ഉറക്കം വരാതെ ബുദ്ധിമുട്ടുന്നവർക്ക് മത്തങ്ങ വിത്ത് ഒരു മികച്ച പരിഹാരമാണ്. ഇതിലടങ്ങിയിരിക്കുന്ന ട്രിപ്റ്റോഫാൻ എന്ന അമിനോ ആസിഡും മഗ്നീഷ്യവും നാഡീവ്യൂഹത്തെ ശാന്തമാക്കുകയും മികച്ച ഉറക്കം നൽകാൻ സഹായിക്കുകയും ചെയ്യുന്നു. ശരീരത്തിലെ പേശികൾക്ക് അയവ് വരുത്താനും ഇത് നല്ലതാണ്.
2. ദഹനവും കുടലിന്റെ ആരോഗ്യവും
മലബന്ധം കാരണം ബുദ്ധിമുട്ടുന്നവർക്ക് മത്തങ്ങ വിത്തുകൾ ആശ്വാസം നൽകും. മഗ്നീഷ്യം കുടലിലെ പേശികളെ ലഘൂകരിക്കുകയും സുഗമമായ മലവിസർജനത്തിന് സഹായിക്കുകയും ചെയ്യുന്നു. കൂടാതെ, ഇതിലെ ഉയർന്ന സിങ്ക്, പ്രോട്ടീൻ എന്നിവ കുടലിന്റെ ആരോഗ്യം വീണ്ടെടുക്കാൻ സഹായിക്കുന്നു.
3. ഹൃദയാരോഗ്യം സംരക്ഷിക്കുന്നു
രക്തസമ്മർദം കൃത്യമായി നിലനിർത്താൻ മഗ്നീഷ്യം അത്യാവശ്യമാണ്. മത്തങ്ങ വിത്തിൽ ധാരാളമായി അടങ്ങിയിരിക്കുന്ന മഗ്നീഷ്യം ഹൃദയത്തിന്റെ സുഗമമായ പ്രവർത്തനത്തെ സഹായിക്കുകയും ഹൃദ്രോഗ സാധ്യത കുറയ്ക്കുകയും ചെയ്യുന്നു. ശരീരത്തിലെ ചീത്ത കൊളസ്ട്രോൾ കുറയ്ക്കാനും ഇവയിലെ ഹെൽത്തി ഫാറ്റുകൾക്ക് കഴിവുണ്ട്.
4. അമിത സമ്മർദം കുറയ്ക്കുന്നു
ഇന്നത്തെ കാലത്ത് മാനസിക സമ്മർദവും ഉത്കണ്ഠയും അനുഭവിക്കുന്നവർ ഏറെയാണ്. മത്തങ്ങ വിത്തുകളിലെ പോഷകങ്ങൾ നാഡീവ്യൂഹത്തെ ശാന്തമാക്കുന്നതിലൂടെ മാനസികാവസ്ഥ മെച്ചപ്പെടുത്താനും സ്ട്രെസ് കുറയ്ക്കാനും സഹായിക്കും.
എങ്ങനെ ഭക്ഷണത്തിൽ ഉൾപ്പെടുത്താം?
വളരെ എളുപ്പത്തിൽ തന്നെ മത്തങ്ങ വിത്തുകൾ നമ്മുടെ ഭക്ഷണത്തിന്റെ ഭാഗമാക്കാം. നേരിയ രീതിയിൽ വറുത്ത് വൈകുന്നേരങ്ങളിലെ ലഘുഭക്ഷണമായി ഇവ കഴിക്കാവുന്നതാണ്. അതല്ലെങ്കിൽ സാലഡുകൾ, സ്മൂത്തികൾ, ഓട്സ് എന്നിവയ്ക്ക് മുകളിൽ വിതറിയും ഇത് ഉപയോഗിക്കാം.
പണച്ചെലവില്ലാതെ, തികച്ചും സ്വാഭാവികമായ രീതിയിൽ ആരോഗ്യം സംരക്ഷിക്കാൻ ഈ ആഴ്ച മുതൽ തന്നെ ഒരു പിടി മത്തങ്ങ വിത്തുകൾ ശീലമാക്കാൻ ഡോക്ടർ നിർദേശിച്ചു.
